Қорақалпоғистон воқеалари бўйича қўлга олинганларнинг 24 нафари жамоат кафиллиги асосида ўз оиласига қайтарилгани ҳақида хабар берилганди. Қорақалпоғистонда бўлиб ўтган воқеаларни мустақил равишда ўрганаётган комиссия аъзолари таклифи билан яна 10 нафар шахснинг қамоқ эҳтиёт чораси уй қамоғига алмаштирилди.
Таъкидланишича, комиссия аъзолари таклифи ва Қорақалпоғистон Жўқорғи Кенгеси илтимосномасига кўра, Бош прокуратура томонидан 24 нафар гумонланувчининг жамоат кафиллиги асосида ўз оиласига қайтарилганди. Шу куннинг ўзида яна 10 нафар фуқаронинг қамоқ эҳтиёт чораси инсонпарварлик тамойили асосида уй қамоғи тарзидаги эҳтиёт чорасига алмаштирилди.
30 август кунининг ўзида жами 34 нафар фуқаро инсонпарварлик тамойили асосида оиласига қайтарилди.
Маълумот учун, Бош прокуратурага киритилган рўйхат, намойишларда иштирок этганликда гумон қилиниб олиб кетилган шахсларнинг оила аъзолари томонидан комиссияга қилинган мурожаатларининг ўрганилиши ва гумонланувчилар билан шахсан суҳбатлашиш асосида шакллантирилган.
Комиссия томонидан содир этган қилмишларидан пушаймон бўлган, қарамоғида вояга етмаган фарзандлари бор, шунингдек, оилавий шароити ва ижтимоий ҳолати оғир ҳамда оилада ёлғиз боқувчи бўлган фуқаролар рўйхати шакллантирилган.
Яккама-якка шаклда ўтказилган суҳбат давомида улар вазиятни яхши англамаган ҳолда ёлғон ахборотлар таъсирига тушиб қолганини ва содир этган қилмишига чин кўнгилдан пушаймон эканини билдирган. Айниқса, аёллар фарзандларини жуда соғингани ва бўлиб ўтган воқеалардан тўғри хулоса чиқарганини маълум қилган.
Изоҳ (0)