Iroq poytaxti Bag‘dodda shialar yetakchisi Muqtadi as-Sadr va huquq-tartibot organlari o‘rtasida to‘qnashuvlar boshlandi, oqibatda kamida 15 kishi halok bo‘ldi, deb yozadi “RBK”.
Shifokorlar bergan ma’lumotga ko‘ra, qurbonlarning o‘n nafari otishmalar natijasida halok bo‘lgan. Al Arabiya nashri muxbiri aniqlik kiritishicha, marhumlar orasida ikki nafar iroqlik harbiy bor.
Al Hadath ham 15 kishi halok bo‘lganini ma’lum qildi, yana 350 kishi otishma yoki ko‘zni yoshlantiruvchi gaz tufayli jabr ko‘rgan.
Al Arabiya ma’lumotlariga ko‘ra, ijtimoiy tarmoqlarda tarqalgan videolarda AQSHning Iroqdagi xodimlari vertolyotlarda “yashil hudud” (Bag‘dodning hukumat va chet el obyektlari joylashgan tumani)dan olib ketilayotgani aks etgan. Biroq Davlat departamenti noroziliklar fonida o‘z diplomatlari evakuatsiya qilingani haqidagi axborotni yolg‘on deb atadi.
Iroqdagi noroziliklar Muqtadi as-Sadr o‘z siyosiy faoliyatini yakunlash qarorini e’lon qilganidan keyin yana kuchayib ketdi. U bu qarorini mamlakatdagi siyosiy vaziyat boshi berk ko‘chaga kirib qolgani bilan izohladi.
Shunda uning tarafdorlari Bag‘dodda hukumat shtabi majlis o‘tkazadigan Respublika saroyiga bostirib kirdi. Vazirlar kengashi ish to‘xtatib turilishini ma’lum qildi, Iroq poytaxtida komendantlik soati e’lon qilindi.
Iroq bosh vaziri Mustafo al-Kozimiy as-Sadrga murojaat qilib, o‘z tarafdorlarini hukumat binolari va “yashil hudud”ni tark etishga chaqirishni talab qildi.
Iroqdagi siyosiy inqiroz 2021-yil kuzidan buyon davom etmoqda. O‘shanda mamlakatda parlament saylovlari bo‘lib o‘tgan, qo‘lga kiritilgan mandatlar soni bo‘yicha as-Sadr tarafdorlari yetakchi bo‘lgan edi. Saylovdan keyin yangi bosh vazir tayinlanishi kerak edi, biroq bu haligacha amalga oshirilgani yo‘q, sadrchilar esa parlamentdan chiqishini e’lon qildi. Bosh vazir lavozimida 2020-yilda tayinlangan Mustafo al-Kozimiy ishlashda davom etmoqda.
Izoh (0)