Ukraina armiyasi anchadan beri kutilayotganidek, mamlakatning bosib olingan janubiy qismiga hujum boshlaganini ma’lum qildi, deb yozadi Meduza.
“Ukraina Qurolli kuchlari Ukraina janubida ko‘plab yo‘nalishlar bo‘yicha, shu jumladan, Xerson viloyatida ham hujum harakatlarini boshladi”, — dedi “Janub” qo‘riqlov va mudofaa kuchlari rasmiy vakili Natalya Gumenyuk.
O‘z navbatida, “Kaxovka” tezkor qo‘shinlar guruhi DXRning 109-polki va uni qo‘llab-quvvatlab turgan rossiyalik desantchilar o‘z pozitsiyalaridan chekinganini ma’lum qildi. Guruh e’lon qilgan videoda rossiyalik harbiy yoki DXR jangchisi deb taxmin etilayotgan shaxs 29-avgust kuni Ukraina Qurolli kuchlari (UQK) “mudofaaning birinchi chizig‘ini yorib kirgani”ni aytgan. Bu haqda boshqa nashrlar ham yozgan.
Odessa viloyati harbiy ma’muriyati rahbari o‘rinbosari Aleksey Matsulevich Xerson uchun janglar boshlangani haqida yozib, so‘ng postini o‘chirib tashladi. Bundan tashqari, Ukraina Telegram-kanallari UQK bosh qo‘mondoni Valeriy Zalujniyga tayanib, Ukraina armiyasi Xerson viloyatidagi Suxoy Stavok aholi punktini egallagani haqida xabar tarqatdi. Biroq bu ma’lumot Zalujniyning norasmiy kanalida paydo bo‘ldi va hozircha rasman tasdiqlangani yo‘q.
Ukraina prezidenti ofisi rahbari maslahatchisi Mixail Podolyak jamoatchilik ko‘zi oldidagi shaxslarni “super shov-shuvli bayonotlar” bermaslikka chaqirdi. “Sizning istaklaringiz va orzularingizni tushunaman. Ammo baribir bizning har qanday harbiy harakatlarimizga nisbatan izohlarning ehtiyotkorona formatidan kelib chiqishni taklif etaman…” — dedi u. Gumenyuk qo‘shimcha qilishicha, “har qanday jangovar operatsiya jimjitlik talab qiladi”. “Bunday ijobiy yangiliklarni odamlar juda uzoq kutganini tushungan holda, haqiqatan ham qandaydir harakatlar boshlaganimiz haqida ma’lum qilishimiz mumkin edi. Biroq bundan keyin o‘zingizni tiyib turishni va bu voqealarni tarqatib yubormaslikni, qo‘shimcha tafsilotlarni qidirib topmaslikni so‘raymiz…” — deya aniqlik kiritdi u.
AQSHning ikki mansabdori CNN’ga UQK “jiddiy qarshi hujum” uchun sharoitlarni tayyorlayotgani haqida ma’lum qildi. Nashr suhbatdoshlariga ko‘ra, bunday operatsiyalar hujum oldidan qilinadigan standart amaliyot bo‘lib, jang maydonini tayyorlash uchun qurol-yarog‘ omborlariga, qo‘mondonlik punktlariga va boshqa harbiy nishonlarga zarbalar berishni o‘z ichiga oladi. Hujum rejalariga o‘z ta’sirini o‘tkazgan narsalardan biri shu bo‘ldiki, AQSHning hisob-kitoblariga ko‘ra, Rossiya front oldingi chizig‘iga taxmin qilinganidan ko‘ra kamroq bo‘linmalarni joylashtira olgan, deya qo‘shimcha qildi CNN jurnalisti Jim Shutto ismi oshkor etilmagan amerikalik mansabdorga tayanib.
Xerson viloyatining Rossiya nazorati ostidagi ma’muriyati hujum bo‘lmaganini ma’lum qildi. “Bu feyk, UQK hujumi — bu qandaydir xom xayol, kino. Hech kim hech qayerga hujum qilmayapti, hech kim chekinmayapti. Bularning hammasi fantaziya. Xotirjam yashayapmiz, rivojlanyapmiz”, — deya ma’lum qildi “ma’muriyat” vakili Kirill Stremousov “TASS”ga. Uning so‘zlariga ko‘ra, “G‘arb Ukraina hukumatidan ma’lum bir harakatlarni talab qilmoqda, Zelenskiy esa qandaydir chora ko‘radigan holatda emas, shuning uchun ham tinch aholini o‘qqa tutishmoqda”.
Xersonning uch nafar fuqarosi Belarusning “Zerkalo” nashriga ma’lum qilishicha, shaharda janglar bo‘layotgani yo‘q. Shu bilan birga, ularning so‘zlariga ko‘ra, o‘tgan tunda portlashlar tovushlari odatdagidan ko‘ra ko‘proq eshitilgan. Rossiyalik harbiy muxbir Roman Saponkov Xerson va Nikolayev viloyatlari chegarasidagi Davidov Brod qishlog‘i yaqinida (Xersondan taxminan 100 km uzoqlikda) bo‘lib qaytganini aytib berdi. Uning aytishicha, tushirilgan desantlar shu zahoti jangga kirishib ketganini ko‘rgan. Ayni vaqtda Saponkov qo‘shinlarning bir qismi chekingani haqidagi ma’lumotni tasdiqlagan: “Ertalabdan ittifoq qismlari juftakni rostlash bo‘yicha suriyacha normativni bajardi. Safarbar qilingan erkaklar, ularni ayblashim qiyin. Doimiy xizmatdagi desantlarning kam-kemtiklarini tuzatishadi”.
Bosib olingan Novaya Kaxovkada 29-avgust kuni o‘qqa tutishlar tufayli ish joylaridan evakuatsiyalar haqida e’lon qilindi. Ukraina tomoni ham Novaya Kaxovka yaqinida joylashgan Berislav shahrida mashinasozlik zavodiga zarba berilgani haqida ma’lum qildi. Ularning talqiniga ko‘ra, zavodda Rossiya armiyasining texnikasi va o‘q-dorilari bo‘lgan, shuningdek, rossiyalik harbiylar ham bo‘lgan. Gumenyuk bosib olingan hududlar aholisini pana joy topishga chaqirdi va “hozir voqealar rivoji juda tez bo‘layotganini, vaziyat shiddat bilan o‘zgarayotgani”ni aytdi.
Rossiya Mudofaa vazirligi Ukrainaning hujumi muvaffaqiyatsizlikka uchraganini ma’lum qildi. Muassasa talqini bo‘yicha, UQK Nikolayev va Xerson viloyatlarida uchta yo‘nalishda hujum qilgan, ammo “katta talafotlar” ko‘rgan. “Janglar chog‘ida Ukrainaning 26 ta tanki, 23 ta piyoda qo‘shinlari jangovar mashinalari, to‘qqizta boshqa jangovar zirhli mashinalar yo‘q qilindi, ikkita Su-25 samolyoti urib tushirildi. Dushman tomonning askarlar bo‘yicha talafoti 560 kishini tashkil qildi. Dushmanning hujum harakatlarini amalga oshirish bo‘yicha navbatdagi urinishi sharmandalarcha muvaffaqiyatsizlikka uchradi”, — deya da’vo qilmoqda Rossiya Mudofaa vazirligi. UQK Bosh shtabi o‘zining kechki ma’lumotnomasida hujum haqida hech qanday xabar bermadi.
Keyinroq CNN Ukraina armiyasidagi manbasiga tayanib, UQK Xerson viloyatida to‘rtta qishloqni ozod etganini ma’lum qildi. Uning so‘zlariga ko‘ra, gap Tomina Balka, Pravdino, Novodmitrovka va Arxangelskoye qishloqlari haqida bormoqda. “Ko‘ramiz, bundan keyin nima bo‘larkan. Bizning nishonimiz — Xerson”, — dedi CNN manbasi.
Izoh (0)