Jizzax viloyatining Zarbdor tumanida bir kishining o‘limi bilan yakunlangan YTH yuz berdi. Bu haqda viloyat IIB matbuot xizmati xabar berdi.
Ma’lum qilinishicha, voqea 24-avgust kuni soat 09:35 larda A-376 Qo‘qon—Jizzax avtomobil yo‘lining 274-kilometrida sodir bo‘lgan. Zarbdor tumanida yashovchi haydovchi Matiz mashinasini Jizzax yo‘nalishida boshqarib ketayotib yo‘lni kesib o‘tayotgan fuqaroni urib yuborgan.
Oqibatda shu tumanda yashovchi 64 yoshli piyoda og‘ir tan jarohatlari olib, shifoxonaga yotqizilgan. Biroq ko‘rsatilgan muolajalarga qaramay vafot etgan.
Holat yuzasidan Zarbdor tumani IIB tomonidan jinoyat ishi qo‘zg‘atilgan.
Izoh (0)