29-avgust kuni Oliy Majlis Senatining Sud-huquq masalalari va korrupsiyaga qarshi kurashish qo‘mitasining majlisi bo‘lib o‘tdi. Bu haqda yuqori palata axborot xizmati xabar qildi.
Qayd etilishicha, unda “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish haqida”gi qonun hamda Davlat organlari va tashkilotlari tizimida 2022-yilning birinchi yarmida murojaatlar bilan ishlash holati muhokama qilingan.
Muhokama davomida Jinoyat kodeksi, Ma’muriy javobgarlik to‘g‘risidagi kodeks hamda “Tashuvchining fuqarolik javobgarligini majburiy sug‘urta qilish to‘g‘risida”gi qonunga tegishli o‘zgartirishlar kiritilayotganligi aytib o‘tilgan.
Xususan, mamlakatda elektron to‘lov vositasidan firibgarlik, ya’ni aldash yoki ishonchini suiiste’mol qilish yo‘li bilan o‘zganing mulkiga bo‘lgan huquqlarni qo‘lga kiritish bilan bog‘liq jinoyatlarni Jinoyat kodeksining 168 (firibgarlik) va 169-modda (o‘g‘rilik)larini og‘irlashtiruvchi holat sifatida javobgarlikni belgilovchi norma bilan to‘ldirilayotganligi qayd etilgan.
Izoh (0)