29-avgust kuni bo‘lib o‘tgan Oliy Majlis Senatining Fan, ta’lim va sog‘liqni saqlash masalalari qo‘mitasi majlisida “Elektron raqamli imzo to‘g‘risida”gi qonun dastlabki tarzda muhokama qilindi. Bu haqda yuqori palata axborot xizmati xabar qildi.
Qayd etilishicha, unda qo‘mita a’zolari, vazirlik va idoralar rahbarlari hamda ommaviy axborot vositalari vakillari ishtirok etgan.
“Elektron raqamli imzo to‘g‘risida”gi qonun 2003-yilda qabul qilingan bo‘lib, bugungi kundagi yangilanishlar ushbu qonunga qator o‘zgartirishlar kiritishga ehtiyoj mavjud ekanligini ko‘rsatmoqda. Shu munosabat bilan mazkur qonun yangi tahrirda ishlab chiqilgan.
Qonunning maqsadi elektron raqamli imzodan foydalanish sohasidagi munosabatlarni tartibga solishdan iborat. Yangi tahrirdagi qonun amaldagisi bilan bir qator yangi normalar bilan farqlanishi ko‘zda tutilmoqda.
Xususan, elektron raqamli imzodan foydalanish sohasidagi davlat siyosatining asosiy yo‘nalishlari belgilanmoqda. Shuningdek, hukumatning elektron raqamli imzodan foydalanish sohasidagi vakolatlari kiritilmoqda.
Qonunda amaldagi tahrirdan farqli ravishda bir qator normalarga, shu jumladan, elektron raqamli imzodan foydalanish sohasini davlat tomonidan tartibga solish, elektron raqamli imzolar kalitlarini ro‘yxatga olish markazlarining faoliyati, elektron raqamli imzo kalitlarining sertifikatlari bilan bog‘liq qoidalarga tegishli boshqa tahririy o‘zgartirishlar ham kiritilmoqda.
Majlis so‘ngida ko‘rilgan masalalar yuzasidan qo‘mita qarorlari qabul qilingan.
Izoh (0)