O‘zbekistonning Braziliyadagi elchisi (qarorgohi Vashington shahrida) Javlon Vahobov Brazilia shahriga tashrifi davomida poytaxt shahar Xalqaro aloqalar ofisi direktori o‘rinbosari Emiliano Diogenes Abreu bilan muzokaralar o‘tkazdi, deb xabar bermoqda Dunyo axborot agentligi.
Qayd etilishicha, uchrashuv davomida O‘zbekiston olib borilayotgan islohotlar, shaharsozlik borasida erishilayotgan yutuqlar va ustuvor vazifalar, muhandislik, me’morchilik, qurilish va qurilish materiallari texnologiyalari sohalarida kadrlar tayyorlash masalalari, xalqaro hamkorlik haqida batafsil ma’lumot berilgan.
Uchrashuv davomida Braziliya vakili O‘zbekiston poytaxti bilan ikki tomonlama hamkorlik qilishga tayyorligini bildirib, atrof-muhit, sog‘liqni saqlash, shahar boshqaruvi, energetika, transport va shaharsozlik kabi sohalar alohida qiziqish kasb etishini ta’kidlab o‘tgan. Bundan tashqari, jamoat xavfsizligi, suv resurslari, qattiq chiqindilar, qayta tiklanadigan energiya, madaniy meros va sport kabi yo‘nalishlarda ham istiqbolli munosabatlar o‘rnatilishiga istak borligi ma’lum qilingan.
O‘zbekiston shaharlari bilan birodarlik aloqalarini o‘rnatish va ilg‘or tajriba almashinuvini yo‘lga qo‘yish har tomonlama manfaatli bo‘lishi qayd etilgan.
Muloqot yakunida tomonlar ekspertlar darajasida yaqin hamkorlik va muzokaralarni davom ettirishga kelishib olgan.
Izoh (0)