Buyuk Britaniya tomonidan Ukraina Qurolli kuchlariga taqdim etilayotgan harbiy va moliyaviy ko‘mak yil oxiriga kelib tugaydi. Bu haqda The Times gazetasi Britaniya Mudofaa vazirligidagi manbasiga tayanib xabar berdi, deb yozadi “RBK”.
“Britaniyada Ukrainaga berish mumkin bo‘lgan qurol tugab bormoqda. Voqelik shundan iboratki, Birlashgan Qirollikning moliyaviy hissasi yil oxiriga kelib o‘z nihoyasiga yetadi”, — dedi gazeta suhbatdoshi.
Ayni vaqtda, The Times qayd etishicha, Britaniya yangi bosh vaziri Birlashgan Qirollikda moliyaviy vaziyat keskin bo‘lib turgan sharoitda Kiyevni qo‘llab-quvvatlashgan “milliardlab funt sterling” sarflash maqsadga muvofiqligi yuzasidan qaror qabul qilishi kerak bo‘ladi.
Ukrainada Rossiya harbiy operatsiyasi boshlanganidan buyon Buyuk Britaniya Kiyevga harbiy yordam berilishi haqida bir necha marta e’lon qilgan. So‘nggi marta 27-avgust kuni Britaniya Mudofaa vazirligi Kiyevga oltita suvosti dronlari yuborilishini, ular qirg‘oqqa yaqin suvlarda minalarni topishda yordam berishini e’lon qilgandi.
Iyun oyida “RBK” Kil jahon iqtisodiyoti institutining Ukraine Support Tracker loyihasi asosida Londonning Kiyevga harbiy va gumanitar yordami 75 milliard dollardan oshganini hisoblab chiqqandi, bu Ukrainaning bir yillik davlat budjetidan 1,6 marta ko‘p demakdir.
Avvalroq Ukrainaga yordam sifatida yuborish uchun qurol-yarog‘ zaxirasi tugab bitgani haqida Germaniya kansleri Olaf Shols ham ma’lum qilgandi.
Rossiya hukumati Ukrainaga G‘arb qurol-yarog‘lari yetkazib berilishini qoralaydi va ular maxsus operatsiya maqsadlariga erishishda xalal bermasligini aytadi. Shuningdek, Rossiya TIV bunday qurollar ortilgan konvoylar qonuniy harbiy nishonlar bo‘lib hisoblanishini ko‘p bora ta’kidlagan.
Izoh (0)