Afg‘oniston sobiq prezidenti Karzay “Tolibon” tomonidan kaltaklangani aytilmoqda

“Tolibon” harakati jangarilari Afg‘oniston sobiq prezidenti Hamid Karzayni kaltaklagan, unga o‘lim bilan ham tahdid qilishgan. Bu haqda Afg‘oniston bo‘yicha ekspert Andrey Serenkoga tayanib, Asia-Plus ma’lum qildi.

Mutaxassisning so‘zlariga ko‘ra, voqea ikki hafta oldin Hamid Karzay Afg‘onistondagi maktablarning yopilishida Pokistonni tanqid qilganidan keyin sodir bo‘lgan.

“Tolibon’ guruhi uning Kobuldagi uyiga bostirib kirgan. Afg‘oniston Milliy qarshilik fronti manbalariga ko‘ra, ‘Tolibon’ jangarilari Karzayni kaltaklagan... Ayni paytda mamlakatning sobiq prezidentiga o‘lim bilan ham tahdid qilingan. ‘Ma’rifiy suhbat’ yakunida toliblar Karzayni ‘Tolibon’ va Pokistonni ortiq tanqid qilmaslik haqida ogohlantirgan”, — deydi Serenko o‘zining Telegram-kanalidagi postida.

Hamid Karzay Afg‘onistonni 2001-yil dekabridan 2004-yilgacha prezident vazifasini bajaruvchi, 2004-yil dekabridan 2014-yilgacha saylangan prezident sifatida boshqargan.

“Tolibon” hokimiyatga kelishi bilan u yana bir davlat arbobi Abdulla Abdulla bilan birga tansoqchilaridan mahrum qilingan, keyin esa uy qamog‘iga olingan.

Ma’lumotlarga ko‘ra, hozir Karzayga mamlakat tashqarisiga chiqish taqiqlangan.

Mavzuga doir: Afg‘oniston sobiq prezidenti Hamid Karzay “Tolibon” siyosatini tanqid qilib chiqdi