Rossiya prezidenti Vladimir Putin Turkmaniston sobiq prezidenti Gurbanguli Berdimuhamedovni IV darajali “Vatan oldidagi xizmatlari uchun” ordeni bilan taqdirladi, deb yozadi Meduza. Tegishli farmon huquqiy axborot rasmiy internet-portalida e’lon qilindi.
Berdimuhamedov ordenni ikki mamlakat o‘rtasidagi “strategik sheriklikni mustahkamlashga qo‘shgan katta hissasi” uchun qo‘lga kiritdi, deyiladi hujjatda.
Gurbanguli Berdimuhamedov 2007-yilda, davlatning birinchi rahbari Saparmurat Niyazovning vafotidan keyin Turkmaniston prezidentiga aylangan edi. Berdimuhamedov hukmronligi davrida mamlakatda uning shaxsiga sig‘inish yuzaga keldi, uning o‘zi esa “Arkadag‘” (“Katta tayanch”, “Ortimizda turgan tog‘”) degan rasmiy nomga ega bo‘ldi.
Berdimuhamedov 2022-yil boshida prezident lavozimini muddatidan oldin tark etdi va buni “yoshlarga yo‘l berish” zarurligi bilan izohladi. Mamlakatning yangi prezidenti etib uning o‘g‘li Serdar Berdimuhamedov saylandi.
May oyida Rossiya prezidenti Vladimir Putin Turkmaniston rahbari Serdar Berdimuhamedovni “Rossiya va Turkmaniston o‘rtasidagi strategik sheriklikni mustahkamlashga qo‘shgan katta hissasi uchun” Do‘stlik ordeni bilan taqdirlagan edi.
2017-yilda xuddi shunday sabab bilan — “Rossiya va Turkmaniston o‘rtasidagi strategik sheriklikni mustahkamlashga qo‘shgan katta hissasi uchun” Putin o‘sha vaqtdagi Turkmaniston prezidenti Gurbanguli Berdimuhamedovni ham taqdirlagandi. Ammo katta Berdimuhamedovga Do‘stlik ordeni emas, balki Aleksandr Nevskiy ordeni berilgan.
Izoh (0)