Россия президенти Владимир Путин Туркманистон собиқ президенти Гурбангули Бердимуҳамедовни IV даражали «Ватан олдидаги хизматлари учун» ордени билан тақдирлади, деб ёзади Meduza. Тегишли фармон ҳуқуқий ахборот расмий интернет-порталида эълон қилинди.
Бердимуҳамедов орденни икки мамлакат ўртасидаги «стратегик шерикликни мустаҳкамлашга қўшган катта ҳиссаси» учун қўлга киритди, дейилади ҳужжатда.
Гурбангули Бердимуҳамедов 2007 йилда, давлатнинг биринчи раҳбари Сапармурат Ниязовнинг вафотидан кейин Туркманистон президентига айланган эди. Бердимуҳамедов ҳукмронлиги даврида мамлакатда унинг шахсига сиғиниш юзага келди, унинг ўзи эса «Аркадағ» («Катта таянч», «Ортимизда турган тоғ») деган расмий номга эга бўлди.
Бердимуҳамедов 2022 йил бошида президент лавозимини муддатидан олдин тарк этди ва буни «ёшларга йўл бериш» зарурлиги билан изоҳлади. Мамлакатнинг янги президенти этиб унинг ўғли Сердар Бердимуҳамедов сайланди.
Май ойида Россия президенти Владимир Путин Туркманистон раҳбари Сердар Бердимуҳамедовни «Россия ва Туркманистон ўртасидаги стратегик шерикликни мустаҳкамлашга қўшган катта ҳиссаси учун» Дўстлик ордени билан тақдирлаган эди.
2017 йилда худди шундай сабаб билан — «Россия ва Туркманистон ўртасидаги стратегик шерикликни мустаҳкамлашга қўшган катта ҳиссаси учун» Путин ўша вақтдаги Туркманистон президенти Гурбангули Бердимуҳамедовни ҳам тақдирлаганди. Аммо катта Бердимуҳамедовга Дўстлик ордени эмас, балки Александр Невский ордени берилган.
Изоҳ (0)