Eron tashqi ishlar vaziri Amir Abdullahiyon Tehrondan sanksiyalarning olib tashlanishi bilan bog‘liq masala hademay hal bo‘lishiga umid bildirdi. Bu haqda Eronning Iran International telekanali ma’lum qildi.
Avvalroq Eron Bryussel tomonidan taklif qilingan yadro bitimini qayta tiklash haqidagi kelishuv loyihasi bo‘yicha Vashingtondan javob olgani xabar berilgan edi.
O‘z navbatida Yevroittifoq Tehrondan Bryusselning taklifi bo‘yicha javob olganini tasdiqladi. Yevroittifoq hukumati Tehronning javobiga ijobiy munosabat bildirgan.
OAVlar qayd etishicha, agar Erondan sanksiyalar qisman olib tashlansa, Tehron Yevropa bozorida Rossiya nefti va neft mahsulotlari o‘rnini egallashi mumkin.
Shuningdek, Bloomberg yozishicha, Vashington va Tehron asosiy ziddiyatlarni bartaraf qilishi uchun bir necha hafta kerak bo‘ladi: gap Eronning yadroviy sohadagi avvalgi faoliyati yuzasidan xalqaro tekshiruv hamda AQSH bitimdan chiqqan taqdirdagi kafolatlar haqida bormoqda.
2015-yilda Buyuk Britaniya, Germaniya, Xitoy, Xitoy, Rossiya, AQSH, Fransiya va Eron yadro bitimi — Birgalikdagi keng qamrovli harakatlar rejasida (BKQHR)ni tuzgan edi, unga ko‘ra Tehron o‘zining yadroviy dasturini faqat tinch maqsadlarda rivojlantirishni cheklashi kerak. Maxsus shartlar, jumladan, uranni boyitish darajasi, sanktsiyalarni bosqichma-bosqich olib tashlash evaziga MAGATE inspektorlarini Eron yadroviy obyektlariga kiritish bo‘yicha kelishib olingan. AQShning sobiq prezidenti Donald Tramp 2018-yilda AQShni BKQHRdan bir tomonlama chiqardi va Eronga qarshi sanksiyalarni qayta joriy qildi, bu esa Tehronni kelishuvning ayrim shartlaridan voz kechishga majbur etdi.
Keyinchalik, 2021-yilning aprelidan dekabrigacha Eron va bir qator jahon kuchlari Venada BKQHRni tiklash bo‘yicha bir necha bosqichli muzokaralar o‘tkazdi. AQSH ularda bevosita ishtirok etmadi.
Muzokaralarning navbatdagi raundi Avstriya poytaxtida avgust boshida bo‘lib o‘tdi, unda Yevroittifoqdan koordinator bitimning yakuniy variantini taklif etdi. Bryussel Tehronga bergan javobda sanksiyalar sohasida va iqtisodiy hamkorlik bilan bog‘liq kafolatlarni taqdim etish bo‘yicha hal bo‘lmagan masalalar haqida aytiladi.
20-avgust kuni Eron bitimni qayta tiklash uchun talablarni yumshatishga rozi bo‘lgani xabar berildi: xususan, Tehron Vashingtonning Islom inqilobi posbonlari korpusiga qarshi sanksiyalari olib tashlanishini endi talab qilmaydi.
Izoh (0)