Moderna biotexnologik kompaniyasi Pfizer va BioNTech kompaniyalariga nisbatan sudga da’vo kiritganini e’lon qildi. Moderna ularni koronavirusga qarshi qo‘shma vaksinasini yaratishda tegishli litsenziya bo‘lmagan holda, patentlangan texnologiyalardan foydalanishda aybladi, deb yozadi Meduza.
“O‘zimiz milliardlab dollar sarmoya kiritib, pandemiyadan ancha avval patentlagan mRNK-vaksinalarning innovatsion texnologik platformasini himoya qilish uchun bu da’volarni kiritdik. Pfizer va BioNTech Moderna texnologiyasining ikkita asosiy xususiyatini noqonuniy ko‘chirib olgan va ulardan ruxsatsiz foydalanishda davom etmoqda, deb hisoblaymiz”, — deyiladi kompaniya bayonotida.
Press-relizga muvofiq, 2020-yil oktabrida Moderna COVID-19 bilan bog‘liq patentlarini pandemiya davrida qo‘llamaslik majburiyatini olgan edi, biroq 2022-yil martida kasallanish bilan bog‘liq vaziyat yumshab, vaksinalar tanqisligi yo‘qolganidan ekyin o‘z shartlarini yangiladi. Xususan, kompaniya past va o‘rta daromad darajasiga ega 92 ta mamlakatga yetkazib berilayotgan koronavirus vaksinalariga nisbatan o‘z patent huquqlariga rioya etilishini talab qilmaslikni o‘z zimmasiga oldi, ammo boshqa bozorlarga nisbatan esa kompaniya Pfizer va BioNTech patentlangan texnologiyalardan foydalanishga tijoriy litsenziya sotib olish imkoniyatini ko‘rib chiqishini kutgandi.
Shu bilan birga, deya qayd etiladi press-relizda, Moderna Comirnaty (Pfizer va BioNTech’ning koronavirusga qarshi vaksinasi nomi) vaksinasi bozordan olib tashlanishiga erishmoqchi emas, past va o‘rta darajadagi daromadli 92 ta mamlakatga vaksinalar yetkazib berilgani yuzasidan, shuningdek, 2022-yil 8-martgacha amalga oshirilgan faoliyat uchun zararlarni qoplashni talab qilmaydi.
Spikevax — Moderna kompaniyasi tomonidan ishlab chiqilgan vaksina koronavirusga qarshi eng keng tarqalgan vaksinalardan biri hisoblanadi. Comirnaty bilan bir qatorda u AQSHda vaksinatsiya strategiyasining asosini tashkil qilgan. 26-avgust holatiga AQSHda 360 million dozadan ortiq Pfizer/BioNTech vaksinasi va 229 million dozadan ziyod Moderna vaksinasi qo‘llanilgan.
Izoh (0)