Эрон ташқи ишлар вазири Амир Абдуллаҳиён Теҳрондан санкцияларнинг олиб ташланиши билан боғлиқ масала ҳадемай ҳал бўлишига умид билдирди. Бу ҳақда Эроннинг Iran International телеканали маълум қилди.
Аввалроқ Эрон Брюссель томонидан таклиф қилинган ядро битимини қайта тиклаш ҳақидаги келишув лойиҳаси бўйича Вашингтондан жавоб олгани хабар берилган эди.
Ўз навбатида Евроиттифоқ Теҳрондан Брюсселнинг таклифи бўйича жавоб олганини тасдиқлади. Евроиттифоқ ҳукумати Теҳроннинг жавобига ижобий муносабат билдирган.
ОАВлар қайд этишича, агар Эрондан санкциялар қисман олиб ташланса, Теҳрон Европа бозорида Россия нефти ва нефть маҳсулотлари ўрнини эгаллаши мумкин.
Шунингдек, Bloomberg ёзишича, Вашингтон ва Теҳрон асосий зиддиятларни бартараф қилиши учун бир неча ҳафта керак бўлади: гап Эроннинг ядровий соҳадаги аввалги фаолияти юзасидан халқаро текширув ҳамда АҚШ битимдан чиққан тақдирдаги кафолатлар ҳақида бормоқда.
2015 йилда Буюк Британия, Германия, Хитой, Хитой, Россия, АҚШ, Франция ва Эрон ядро битими — Биргаликдаги кенг қамровли ҳаракатлар режасида (БКҚҲР)ни тузган эди, унга кўра Теҳрон ўзининг ядровий дастурини фақат тинч мақсадларда ривожлантиришни чеклаши керак. Махсус шартлар, жумладан, уранни бойитиш даражаси, санкцияларни босқичма-босқич олиб ташлаш эвазига МАГАТЭ инспекторларини Эрон ядровий объектларига киритиш бўйича келишиб олинган. АҚШнинг собиқ президенти Дональд Трамп 2018 йилда АҚШни БКҚҲРдан бир томонлама чиқарди ва Эронга қарши санкцияларни қайта жорий қилди, бу эса Теҳронни келишувнинг айрим шартларидан воз кечишга мажбур этди.
Кейинчалик, 2021 йилнинг апрелидан декабригача Эрон ва бир қатор жаҳон кучлари Венада БКҚҲРни тиклаш бўйича бир неча босқичли музокаралар ўтказди. АҚШ уларда бевосита иштирок этмади.
Музокараларнинг навбатдаги раунди Австрия пойтахтида август бошида бўлиб ўтди, унда Евроиттифоқдан координатор битимнинг якуний вариантини таклиф этди. Брюссель Теҳронга берган жавобда санкциялар соҳасида ва иқтисодий ҳамкорлик билан боғлиқ кафолатларни тақдим этиш бўйича ҳал бўлмаган масалалар ҳақида айтилади.
20 август куни Эрон битимни қайта тиклаш учун талабларни юмшатишга рози бўлгани хабар берилди: хусусан, Теҳрон Вашингтоннинг Ислом инқилоби посбонлари корпусига қарши санкциялари олиб ташланишини энди талаб қилмайди.
Изоҳ (0)