Yakunlanayotgan haftada ham O‘zbekistonda muhim voqealar ko‘p bo‘ldi. “Daryo” nashri yakunlanayotgan haftaning eng shov-shuvli voqealar ketma-ketligini esga oladi.
Mazkur hafta boshida O‘zbekiston prezidenti Shavkat Mirziyoyev tadbirkorlar bilan uchrashdi. Uchrashuvda o‘zbekistonlik tadbirkorlar uchun ko‘plab yangiliklar qilingani aytilib, tadbirkorlik sohasi uchun muhim bo‘lgan qator o‘zgarishlar e’lon qilindi.
Endi O‘zbekistonda qorong‘ida ishlash yo‘q bo‘lishi kerak. U zamon o‘tib bo‘ldi. Endi ochiq ishlaylik, halol ishlaylik, soliq to‘laylik, manfaat topaylik, — dedi davlat rahbari tadbirkorlar bilan uchrashuv chog‘ida.Mazkur haftada shuningdek, Qoraqalpog‘iston Respublikasida ham katta o‘zgarishlar ro‘y berdi.
Hafta avvalida avtonom respublikada faoliyat yuritib kelayotgan eng ommabop saytlardan biri o‘z faoliyatini tugatganini e’lon qildi.
Qoraqalpog‘istonda birinchi bo‘lib faoliyatini boshlagan, marhum Furqat Yusupov asos solgan “KRuz.uz” sayti faoliyatini yakunlayapti. Bundan keyin “KRuz.uz” nomi bilan ochilgan har qanday tarmoq yoki guruhlar endi rasmiy statusga ega bo‘lmaydi, — deyiladi saytning Telegram’dagi sahifasida.“Daryo” sayt yopilishiga nima sabab bo‘lgani bilan qiziqib, mas’ullardan izoh oldi. Bu haqda saytda batafsil tanishishingiz mumkin.
Qoraqalpog‘istonda bo‘lgan voqealarni yoritishda inson huquqlari buzilganmi? Ombudsman aholi o‘rtasida anonim so‘rovnoma o‘tkazdi. Ta’kidlanishicha, Qoraqalpog‘istonda bo‘lib o‘tgan voqealarda ishtirok etganlikda gumon qilinib, olib ketilgan shaxslarning oila a’zolari bilan suhbat davomida ulardan ayrimlari ijtimoiy yordamga muhtoj ekanini bildirgan.
Hafta oxiriga kelib Qoraqalpog‘iston hayotiga oid eng muhim voqea yuz berdi. 26-avgust kuni prezident Shavkat Mirziyoyev amaliy tashrif bilan Nukusga keldi. Jo‘qorg‘i Kengesning navbatdan tashqari sessiyasida Qoraqalpog‘iston Jo‘qorg‘i Kengesi raisi Murat Kamalov betobligi sababli lavozimidan ozod etildi. Uning o‘rniga sobiq vazir Amanbay Orinbayevning nomzodini tavsiya etildi va deputatlar tomonidan qo‘llab-quvvatlandi. Tashrif davomida davlat rahbari Qoraqalpog‘istonni ijtimoiy-iqtisodiy rivojlantirish bo‘yicha mas’ullarga topshiriqlar berdi.
Hafta yakunida Toshkent viloyatining Quyi Chirchiq tumanida 31 yoshli erkakning avvaliga xotinini bog‘chada bolalar ko‘z o‘ngida kaltaklagani, so‘ngra uyiga borib, urib o‘ldirib qo‘ygani ma’lum bo‘ldi. Bu ijtimoiy tarmoq foydalanuvchilarining muhokamasiga sabab bo‘ldi.
O‘tayotgan haftada ijtimoiy tarmoqlarda Namangan viloyati hokimi Namangan shahridagi “Okean” suv sporti saroyiga kelishni boshlaganidan so‘ng suzish bo‘yicha mashg‘ulotlar o‘tkazish muammoga aylangani haqida xabarlar tarqaldi. “Daryo” muxbiri ushbu holatga oydinlik kiritish maqsadida mazkur majmua mutasaddilari bilan bog‘landi.
Shuningdek, Innovatsion rivojlanish vazirligi tomonidan moliyalashtirilgan “Ichki va xalqaro turizmning Uchtepa—Buloqmozor majmuasi arxeologik yodgorliklarini o‘rganish va ularni moviy osmon ostidagi muzeyga aylantirish” mavzusidagi amaliy loyiha doirasida Norin tumanida zardushtiylik davriga oid qadimiy ibodatxona aniqlandi.
“Daryo” muxbiri har ikki holat bo‘yicha ham o‘rganish olib borib, batafsil ma’lumot berdi.
Mazkur voqealar haqida saytning ijtimoiy tarmoqlardagi sahifalarida to‘liq ma’lumot olishingiz mumkin.
Izoh (0)