Якунланаётган ҳафтада ҳам Ўзбекистонда муҳим воқеалар кўп бўлди. «Дарё» нашри якунланаётган ҳафтанинг энг шов-шувли воқеалар кетма-кетлигини эсга олади.
Мазкур ҳафта бошида Ўзбекистон президенти Шавкат Мирзиёев тадбиркорлар билан учрашди. Учрашувда ўзбекистонлик тадбиркорлар учун кўплаб янгиликлар қилингани айтилиб, тадбиркорлик соҳаси учун муҳим бўлган қатор ўзгаришлар эълон қилинди.
Энди Ўзбекистонда қоронғида ишлаш йўқ бўлиши керак. У замон ўтиб бўлди. Энди очиқ ишлайлик, ҳалол ишлайлик, солиқ тўлайлик, манфаат топайлик, — деди давлат раҳбари тадбиркорлар билан учрашув чоғида.Мазкур ҳафтада шунингдек, Қорақалпоғистон Республикасида ҳам катта ўзгаришлар рўй берди.
Ҳафта аввалида автоном республикада фаолият юритиб келаётган энг оммабоп сайтлардан бири ўз фаолиятини тугатганини эълон қилди.
Қорақалпоғистонда биринчи бўлиб фаолиятини бошлаган, марҳум Фурқат Юсупов асос солган «KRuz.uz» сайти фаолиятини якунлаяпти. Бундан кейин «KRuz.uz» номи билан очилган ҳар қандай тармоқ ёки гуруҳлар энди расмий статусга эга бўлмайди, — дейилади сайтнинг Telegram’даги саҳифасида.«Дарё» сайт ёпилишига нима сабаб бўлгани билан қизиқиб, масъуллардан изоҳ олди. Бу ҳақда сайтда батафсил танишишингиз мумкин.
Қорақалпоғистонда бўлган воқеаларни ёритишда инсон ҳуқуқлари бузилганми? Омбудсман аҳоли ўртасида аноним сўровнома ўтказди. Таъкидланишича, Қорақалпоғистонда бўлиб ўтган воқеаларда иштирок этганликда гумон қилиниб, олиб кетилган шахсларнинг оила аъзолари билан суҳбат давомида улардан айримлари ижтимоий ёрдамга муҳтож эканини билдирган.
Ҳафта охирига келиб Қорақалпоғистон ҳаётига оид энг муҳим воқеа юз берди. 26 август куни президент Шавкат Мирзиёев амалий ташриф билан Нукусга келди. Жўқорғи Кенгеснинг навбатдан ташқари сессиясида Қорақалпоғистон Жўқорғи Кенгеси раиси Мурат Камалов бетоблиги сабабли лавозимидан озод этилди. Унинг ўрнига собиқ вазир Аманбай Оринбаевнинг номзодини тавсия этилди ва депутатлар томонидан қўллаб-қувватланди. Ташриф давомида давлат раҳбари Қорақалпоғистонни ижтимоий-иқтисодий ривожлантириш бўйича масъулларга топшириқлар берди.
Ҳафта якунида Тошкент вилоятининг Қуйи Чирчиқ туманида 31 ёшли эркакнинг аввалига хотинини боғчада болалар кўз ўнгида калтаклагани, сўнгра уйига бориб, уриб ўлдириб қўйгани маълум бўлди. Бу ижтимоий тармоқ фойдаланувчиларининг муҳокамасига сабаб бўлди.
Ўтаётган ҳафтада ижтимоий тармоқларда Наманган вилояти ҳокими Наманган шаҳридаги «Океан» сув спорти саройига келишни бошлаганидан сўнг сузиш бўйича машғулотлар ўтказиш муаммога айлангани ҳақида хабарлар тарқалди. «Дарё» мухбири ушбу ҳолатга ойдинлик киритиш мақсадида мазкур мажмуа мутасаддилари билан боғланди.
Шунингдек, Инновацион ривожланиш вазирлиги томонидан молиялаштирилган «Ички ва халқаро туризмнинг Учтепа—Булоқмозор мажмуаси археологик ёдгорликларини ўрганиш ва уларни мовий осмон остидаги музейга айлантириш» мавзусидаги амалий лойиҳа доирасида Норин туманида зардуштийлик даврига оид қадимий ибодатхона аниқланди.
«Дарё» мухбири ҳар икки ҳолат бўйича ҳам ўрганиш олиб бориб, батафсил маълумот берди.
Мазкур воқеалар ҳақида сайтнинг ижтимоий тармоқлардаги саҳифаларида тўлиқ маълумот олишингиз мумкин.
Изоҳ (0)