Har bir ta’lim maskani rahbari va oshxona boshlig‘i muassasa oshxonasidagi taomnoma uchun mas’ul — SSV

Yangi o‘quv yili boshlanish arafasida ta’lim muassasalarida o‘quvchilar ovqatlanishini tashkil etish masalasi kun tartibiga chiqadi. Sog‘liqni saqlash vazirligi bu jarayonda amal qilish kerak bo‘lgan sanitariya qoidalari, normalari va gigiyena talablari haqida ma’lumot berdi.

Umumiy o‘rta, o‘rta maxsus, professional ta’lim maskanlarida o‘quvchilar ovqatlanishini tashkil etishning sanitariya qoidalari, normalari va gigiyena normativlari”ga ko‘ra, ta’lim muassasalarida ovqatlanishni tashkil etishda oziq-ovqat mahsulotlarini saqlash uchun mo‘ljallangan hamda xavfsizlik talablariga javob beradigan chinni, fayans va shisha idishlar (tarelka, kosa, piyola, chashka, bokallar)dan foydalanish lozim.

Taomlarni pishirish va saqlash uchun oshxona uskunalari idishlari (qoshiq, vilka, pichoqlar) zanglamaydigan po‘lat yoki gigiyenik xususiyatlariga ko‘ra shunga o‘xshash materiallardan tayyorlangan bo‘lishi kerak. Alyuminiydan tayyorlangan oshxona jihozlaridan foydalanish taqiqlanadi.

Ovqatlanish ratsioni sutka davomida yoki sutkaning ma’lum bir vaqtida bolalar ovqatlanishiga mo‘ljallangan mahsulotlar tarkibini shakllantirishni ko‘zda tutadi.

Taomlar ro‘yxatini taqsimlash, pazandalik, un, qandolat va non mahsulotlari bilan alohida taomlanishni (nonushta, tushlik, ikkinchi tushlik, kechki ovqat) o‘z ichiga olgan taomnoma tuzilishi shu ratsionga asoslanishi lozim.

Ta’lim muassasasining barcha o‘quvchilarini sog‘lom ovqatlanish bilan ta’minlash uchun 10 kundan kam bo‘lmagan muddatga ishlab chiqilgan, shuningdek, taomlar retsepturasi bo‘yicha mahsulotlarning ro‘yxati ko‘rsatilgan menyu-tartibiga muvofiq namunaviy taomnoma tuzilishi mumkin.

Namunaviy taomnoma yil mavsumini, o‘quvchilar yoshi, talab qilinadigan kunlik taom quvvati, asosiy ozuqa moddalarining zaruriy miqdorini hisobga olib shakllantiriladi.

Uni tuzishda o‘quvchilarning ovqatlanishidagi milliy o‘ziga xosliklari, ta’lim muassasasida bo‘lish vaqti, yoshi va jismoniy yuklamasi e’tiborga olinadi.

Ta’lim muassasalari o‘quvchilari uchun ikki mahal (nonushta va tushlik) issiq ovqat tashkil etiladi. Kuni uzaytirilgan guruhlarda tahsil oluvchi bolalarga qo‘shimcha ikkinchi tushlik uyushtiriladi.

Har kuni ovqatlanish zaliga ta’lim muassasasi rahbari bilan kelishilgan va oshxona rahbari tomonidan tasdiqlangan taomning nomi, miqdori ko‘rsatilgan taomnoma ilib qo‘yilishi zarur.