Belarus Oliy sudi Qirg‘iziston sobiq prezident Qurmanbek Bakiyevni vataniga ekstraditsiya qilishdan bosh tortdi. Minsk Bakiyevning Qirg‘izistonda “siyosiy sabablarga ko‘ra ta’qib qilinayotganini” ta’kidlab, shunday qarorga kelgan, deya xabar berdi “Kabar” Qirg‘iziston respublikasi bosh prokuraturasi matbuot xizmatiga tayanib.
Qirg‘iziston bosh prokuraturasi sobiq prezident 2010-yil 7-aprel voqealari va boshqa jinoyat epizodlari uchun sudning 2016-yil 29-iyuldagi qarori bilan 30 yilga ozodlikdan mahrum etilganini eslatdi.
Qirg‘iziston respublikasi bosh prokuraturasi ta’kidlashicha, ular Belarus bosh prokuraturasiga Bishkek garnizoni Harbiy sudi hamda Harbiy sudning jinoiy va ma’muriy huquqbuzarliklar to‘g‘risidagi ishlar bo‘yicha sudlov hay’atining 2016-yil 23-maydagi hukmlarini tan olish va ularni Belarusda ijro etish to‘g‘risida iltimosnoma yuborgan. Shuningdek, bosh prokuratura Bakiyevni jinoiy javobgarlikka tortish uchun ekstraditsiya qilish bo‘yicha Minskka to‘rtta so‘rov yuborgan.
Bakiyev 2005-yilda Qirg‘iziston respublikasi prezidenti bo‘lgandi. U 2010-yilgi aprel voqealari chog‘ida ag‘darilgan, keyinchalik oilasi bilan mamlakatni tark etib, Belarusdan boshpana olgan.
Izoh (0)