Беларусь Олий суди Қирғизистон собиқ президент Қурманбек Бакиевни ватанига экстрадиция қилишдан бош тортди. Минск Бакиевнинг Қирғизистонда «сиёсий сабабларга кўра таъқиб қилинаётганини» таъкидлаб, шундай қарорга келган, дея хабар берди «Кабар» Қирғизистон республикаси бош прокуратураси матбуот хизматига таяниб.
Қирғизистон бош прокуратураси собиқ президент 2010 йил 7 апрель воқеалари ва бошқа жиноят эпизодлари учун суднинг 2016 йил 29 июлдаги қарори билан 30 йилга озодликдан маҳрум этилганини эслатди.
Қирғизистон республикаси бош прокуратураси таъкидлашича, улар Беларусь бош прокуратурасига Бишкек гарнизони Ҳарбий суди ҳамда Ҳарбий суднинг жиноий ва маъмурий ҳуқуқбузарликлар тўғрисидаги ишлар бўйича судлов ҳайъатининг 2016 йил 23 майдаги ҳукмларини тан олиш ва уларни Беларусда ижро этиш тўғрисида илтимоснома юборган. Шунингдек, бош прокуратура Бакиевни жиноий жавобгарликка тортиш учун экстрадиция қилиш бўйича Минскка тўртта сўров юборган.
Бакиев 2005 йилда Қирғизистон республикаси президенти бўлганди. У 2010 йилги апрель воқеалари чоғида ағдарилган, кейинчалик оиласи билан мамлакатни тарк этиб, Беларусдан бошпана олган.
Изоҳ (0)