Pokistonda suv toshqini bilan bog‘liq hodisalarda 48 soat ichida 126 kishi halok bo‘ldi, qurbonlarning aksariyati ayollar va bolalar. Bu haqda mamlakat Tabiiy ofatlarni boshqarish milliy boshqarmasiga tayanib, Associated Press xabar berdi.
Mamlakatda iyun oyi o‘rtalaridan beri davom etayotgan kuchli yomg‘irlar suv toshqinlariga sabab bo‘lmoqda. Oqibatda jami 903 kishi halok bo‘lgan, 50 mingga yaqin odam boshpanasiz qolgan.
Qayd etilishicha, uylari vayron bo‘lgan minglab odamlar hozirda suv ostida qolgan qishloq va shaharlaridan bir necha chaqirim uzoqlikdagi chodirlarda yashamoqda. Odamlarni qutqarishda harbiylar, mahalliy qutqaruvchilar va ko‘ngillilar ishtirok etmoqda.
Toshqin Pokistondagi iqtisodiy inqirozni yanada kuchaytirdi. Bosh vazir Shahboz Sharif xorij davlatlariga murojaat qilib, xayriyachilarni Pokistondagi toshqindan jabr ko‘rgan hududlarga yordam berishga chaqirdi.
Sharif ayni damda Qatarda ham bo‘lgan hamda o‘z mamlakati uchun moliyaviy yordam, kredit va xorijiy sarmoya izlagan. Uning hukumati suv toshqinlarida uylaridan ayrilganlarga tovon puli to‘lashga va’da bergan.
Sharif Qatar amiri Shayx Tamim bin Hamad Al Tani bilan muzokaralarni yakunlagach, Qatar sarmoya boshqarmasi Pokistonga 3 milliard dollar sarmoya kiritishga tayyorligini ma’lum qildi. Ushbu safar Sharifning bosh vazir sifatida Qatarga qilgan ilk rasmiy tashrifidir. Eslatib o‘tamiz, u aprel oyida parlamentning ishonchsizlik votumi ortidan lavozimidan ketgan Imron Xonning o‘rnini egallagandi.
Izoh (0)