2021-yil sentabridan beri Yevropa hukumatlari mintaqadagi energetika inqirozini yumshatish uchun qariyb 280 milliard yevro ajratdi. Bu haqda Bruegel tahliliy markazi ma’lumotlariga tayanib, “Interfaks” xabar bermoqda.
Ushbu miqdorni hisoblash Yevropadagi barcha davlat xarajatlarini, jumladan, Gretsiyadagi kichik biznes uchun tariflarni subsidiyalash va Belgiyadagi to‘g‘ridan-to‘g‘ri to‘lovlarni o‘z ichiga oladi. Biroq ajratilgan mablag‘larning bir qismi haligacha o‘zlashtirilmagan.
Qish davomida narxlar yuqori bo‘ladi va Yevropa davlatlari eng yomon ssenariyga tayyor turishlari kerak, bunda narxlar bundan keyin ham saqlanib qoladi, deydi Bruegel tahlilchisi Jovanni Sgaravatti.
Rossiyadan gaz yetkazib berishning qisqarishi fonida Yevropada energiya narxlari so‘nggi besh yildagi o‘rtacha mavsumiy ko‘rsatkichga nisbatan 10 baravarga oshdi.
Bu omil mintaqadagi iqtisodiy o‘sishga salbiy ta’sir ko‘rsatib, og‘ir sanoatni qiyin ahvolga solib qo‘ymoqda.
Shu bilan birga, oddiy fuqarolar iste’mol tovarlari va xizmatlar narxining keskin oshishiga duch kelmoqda.
Germaniya Yevropa davlatlari orasida energiya inqirozi davrida aholini qo‘llab-quvvatlash uchun eng ko‘p mablag‘ ajratgan — 60,2 mlrd yevro yoki mamlakat yalpi ichki mahsulotining 1,7 foizi.
Bu maqsadlar uchun Italiya 49,5 mlrd yevro (YIMning 2,8 foizi), Fransiya 44,7 mlrd yevro (1,8), Buyuk Britaniya 44,3 mlrd yevro (1,6 foiz) va Ispaniya 27,3 mlrd yevro (2,3 foiz) ajratdi.
Izoh (0)