2021 йил сентябридан бери Европа ҳукуматлари минтақадаги энергетика инқирозини юмшатиш учун қарийб 280 миллиард евро ажратди. Бу ҳақда Bruegel таҳлилий маркази маълумотларига таяниб, «Интерфакс» хабар бермоқда.
Ушбу миқдорни ҳисоблаш Европадаги барча давлат харажатларини, жумладан, Грециядаги кичик бизнес учун тарифларни субсидиялаш ва Бельгиядаги тўғридан-тўғри тўловларни ўз ичига олади. Бироқ ажратилган маблағларнинг бир қисми ҳалигача ўзлаштирилмаган.
Қиш давомида нархлар юқори бўлади ва Европа давлатлари энг ёмон сценарийга тайёр туришлари керак, бунда нархлар бундан кейин ҳам сақланиб қолади, дейди Bruegel таҳлилчиси Жованни Сгараватти.
Россиядан газ етказиб беришнинг қисқариши фонида Европада энергия нархлари сўнгги беш йилдаги ўртача мавсумий кўрсаткичга нисбатан 10 бараварга ошди.
Бу омил минтақадаги иқтисодий ўсишга салбий таъсир кўрсатиб, оғир саноатни қийин аҳволга солиб қўймоқда.
Шу билан бирга, оддий фуқаролар истеъмол товарлари ва хизматлар нархининг кескин ошишига дуч келмоқда.
Германия Европа давлатлари орасида энергия инқирози даврида аҳолини қўллаб-қувватлаш учун энг кўп маблағ ажратган — 60,2 млрд евро ёки мамлакат ялпи ички маҳсулотининг 1,7 фоизи.
Бу мақсадлар учун Италия 49,5 млрд евро (ЯИМнинг 2,8 фоизи), Франция 44,7 млрд евро (1,8), Буюк Британия 44,3 млрд евро (1,6 фоиз) ва Испания 27,3 млрд евро (2,3 фоиз) ажратди.
Изоҳ (0)