Қорақалпоғистондаги воқеаларни ўрганиш мақсадида тузилган комиссия аъзолари 23 август куни штабга келган фуқароларнинг мурожаатларини қабул қилди. Бу ҳақда Олий Мажлиснинг инсон ҳуқуқлари бўйича вакили ахборот хизмати хабар қилди.
Ташриф буюрган мурожаатчилар орасида кўплаб фуқаролар хорижий ҳуқуқни ҳимоя қилиш ташкилотларининг эътибор марказига тушгани ва баъзи ёлғон хабарларда номлари келтирилгани ҳолатлари ҳақида маълум қилган.
Таъкидланишича, Қорақалпоғистонда бўлиб ўтган воқеаларда иштирок этганликда гумон қилиниб, олиб кетилган шахсларнинг оила аъзолари билан суҳбат давомида улардан айримлари ижтимоий ёрдамга муҳтож эканини билдирган. Мурожаатлар жойига чиқиб ўрганилиб, тегишли мутасадди ташкилотларга ёзма мурожаатлар йўлланган. Натижада комиссия тавсиясига кўра, Маҳалла ва нуронийларни қўллаб-қувватлаш вазирлиги томонидан ушбу эҳтиёжманд оилаларга бирламчи озиқ-овқат маҳсулотлари етказиб берилган.
23 август куни комиссия томонидан ҳудуддаги маҳалла фаоллари ҳамда олий таълим муассасалари масъул ходимлари ва педагоглари билан учрашувлар ўтказилиб, аҳоли кайфияти ўрганилган. Шунингдек, Қорақалпоғистонда бўлиб ўтган воқеа ва ҳодисалар юзасидан аноним сўров ўтказилган.
Мазкур сўровномада Қорақалпоғистондаги намойишларни келиб чиқиш сабаблари, унга нисбатан ҳуқуқни муҳофаза қилувчи органлар томонидан кўрилган чоралар, яраланганларга нисбатан кўрсатилган тиббий хизмат сифати, қийноқ ва зўравонлик ҳамда бошқа жиҳатлар қамраб олинган.
Изоҳ (0)