Qashqadaryo viloyatidagi “Kunjutlitepa” arxeologiya yodgorligini to‘liq buzib tashlagan shaxs qamoqqa olindi. Bu haqda Bosh prokuratura matbuot xizmati xabar berdi.
Ma’lum qilinishicha, Yakkabog‘ tumanida yashovchi R.O. mas’ul idoralarning bir necha bor ogohlantirishiga qaramasdan, ushbu hududda joylashgan “Kunjutlitepa” arxeologiya yodgorligini to‘liq buzib, undan chiqqan tuproqni sotib yuborib, madaniy merosga 47,5 milliard so‘mlik zarar yetkazgan.
Holat yuzasidan Yakkabog‘ tumani prokuraturasi tomonidan 15-avgust kuni Jinoyat kodeksining 132-moddasi 3-qismi (Moddiy madaniy meros obyektlarini nobud qilish, buzish yoki ularga shikast yetkazish) bilan jinoyat ishi qo‘zg‘atilib, sudning ajrimi bilan fuqaro R.O. qamoqqa olingan.
Avgust oyi o‘rtalarida Yakkabog‘ tumanida joylashgan X—XII asrlarga oid “Chordangitepa” arxeologiya yodgorligining bir qismi fuqaro tomonidan buzib tashlanib, yodgorlik o‘rnida uy-joy qurib yuborilgani aniqlangandi. Buning oqibatida davlat manfaatlariga 315 million so‘mlik zarar yetkazilgan.
Samarqand tumanida VI—VII asrlarga oid “Nomsiztepa” arxeologiya yodgorligi bir qismi noma’lum shaxslar tomonidan buzilib, davlat manfaatlariga 1,5 milliard so‘mlik zarar yetkazilgan.
Iyul oyida esa Namangandagi Uychi manzilgohi” (Do‘ngtepa) arxeologiya yodgorligi hududidan 10 sotix yer savdo, maishiy va avtomobillarga texnik xizmat ko‘rsatish shoxobchasi qurish uchun ajratib berilishi oqibatida madaniy meros obyektiga 3,9 milliard so‘mlik zarar yetkazilgandi.
Izoh (0)