“Dunyo ularning tanobini tortib qo‘ymadi, biz esa tortyapmiz”. Zelenskiy Rossiya Ukraina bilan muzokaralar haqida “hech qachon o‘ylamaganini” aytdi

Ukraina prezidenti Vladimir Zelenskiy Rossiya bilan muzokaralar haqida “gap ham bo‘lishi mumkin emas”, chunki Rossiya hukumati muloqot emas, urush olib borishga tayyor. Bu haqda u “Qrim platformasi” forumi yakunlari bo‘yicha matbuot anjumanida Al Arabiya nashri jurnalistining savoliga javob berayotib aytib o‘tdi, deb yozadi Meduza.

Zelenskiy Rossiya tomonidan aytilayotgan Ukraina sulh tuzishni xohlamayotgani haqidagi da’volarni “kulgili” deb atadi. Uning ta’kidlashicha, urush “faqat Ukraina hududida” bormoqda, u yerda “faqat Ukraina fuqarolari” o‘ldirilmoqda.

“Rossiya har kunlik hujumlari, yorib o‘tishlari va chekinishlari bilan, bularning barchasini qonli qotilliklar va zo‘ravonliklar bilan olib borgan holda, barchamizga — sizga va bizga — mana shundan boshqa hech qanaqa muzokaralarni ko‘rmayotganini aytmoqda. Biz esa tushuntiryapmizki, ular qilgan narsalarning hammasi ular hech qanaqa muloqot haqida umuman o‘ylamayotgani va oldin ham o‘ylamaganidan darak beradi. Ular bizning mamlakatimizni bosib olishga qaror qildi. Lekin ular 2014-yilda bu qarorni qabul qilganida dunyo unga yaxshigina shapaloq tortmagani uchun, ular davom etaverdi, davom etaverdi. Biz esa ularning tanobini tortyapmiz”, — dedi Zelenskiy.

So‘nggi marta Rossiya va Ukraina mart oxirida Istanbulda yuzma-yuz uchrashuv o‘tkazgandi. O‘shanda ikki mamlakat delegatsiyalari muayyan progressga erishganini ma’lum qilgandi. So‘ng muzokaralar videoaloqa orqali davom etdi, mayda esa ular to‘xtatib qo‘yildi. Tomonlar muzokaralar jarayonini uzib qo‘yishda bir-birini aybladi.

22-avgust kuni Vladimir Zelenskiy agar bosib olingan Mariupolda “Azov”ning asir tushgan jangchilari ustidan sud uyushtirilsa, Ukraina Rossiya bilan muzokaralardan butunlay voz kechishini aytgandi.

Ayni paytda Turkiya prezidenti Rajab Toyyib Erdo‘g‘on Rossiya va Ukraina prezidentlari o‘rtasida muzokaralarni tashkillashtirmoqchi.

Avgust boshida Erdo‘g‘on va Putin Sochida muzokaralar o‘tkazgan edi. CNN Turk ma’lumotlariga ko‘ra, ushbu uchrashuv davomida Rossiya prezidenti Zelenskiy bilan muzokaralar ehtimoli borligiga “ishora qilgan”.

18-avgust kuni Lvovda Ukraina va Turkiya prezidentlari hamda BMT bosh kotibi ishtirokida uch tomonlama sammit bo‘lib o‘tdi. Uning yakunida Zelenskiy agar Rossiya qo‘shinlari Ukrainani tark etsagina RF bilan muzokaralar amalga oshishi mumkinligini ta’kidladi. O‘z navbatida Erdo‘g‘on uch tomonlama uchrashuv natijalarini Putin bilan muhokama qilishini bildirdi.