AQSH Davlat departamenti va Kiyevdagi elchixonasi Ukraina hududida bo‘lib turgan Amerika fuqarolarini zudlik bilan mamlakatni tark etishga chaqirdi. Avvalroq Amerika razvedkasi Rossiya Ukrainaning davlat ob’yektlariga zarbalar berishga tayyorlanayotgani haqida ogohlantirgandi.
Xo‘sh, AQSHning bu xavotirli bayonoti qanchalik asosli? Rossiya vaziyatni keskinlashtirishga tayyorgarlik ko‘rayotgani rostmi?
“Taraqqiyot strategiyasi” markazi bo‘lim boshlig‘i Farrux Hakimov ushbu masala bo‘yicha o‘z fikrlarini bildirib o‘tdi.
“Avvalo shuni ta’kidlash kerakki, AQSH maxsus xizmatlari, ayniqsa “Sovuq urush” davrida egallagan tarixiy tajribaga ega. Ular an’anaviy va zamonaviy vositalar orqali ma’lumotlar bilan ishlash, ularni tahlil qilish va shu asosda xulosa chiqarish bo‘yicha yetakchilar qatorida.
Shundan kelib chiqib aytadigan bo‘lsak, AQSH Davlat departamentining o‘z fuqarolarini zudlik bilan Ukrainani tark etishga bo‘lgan chaqiruvini xavotirli deb atash mumkin.
Hozirda Rossiya va Ukraina o‘rtasidagi urushning front chizig‘i deyarli o‘zgarishlarsiz saqlanib turibdi. Albatta, Rossiya tomoni vaziyatni keskinlashtirish evaziga haddan ziyod cho‘zilib ketgan urushning tezroq tugashiga erishmoqchi bo‘lishi mumkin.
Chunki barchaga ma’lumki, urushning har bir kuni tomonlarning katta sarf-xarajatlarini talab qiladi. Agar vaziyat keskinlashadigan bo‘lsa, mintaqadagi holat yanada og‘irlashadi. Shundoq ham urush tufayli butun dunyo iqtisodiyotiga jiddiy putur yetmoqda, Rossiya iqtisodiyoti esa sanksiyalar tufayli hozirda juda muskul ahvolda kolmoqda. O‘z navbatida, Yevropa davlatlari energetik inqiroz yoqasida turibdi. Buning natijasida hattoki Rossiyaga nisbatan qo‘llanilgan sanksiyalarni yumshatish masalalari ham muhokama qilinmoqda.
Bundan tashqari, Zaporojye hududida joylashgan AES bilan bog‘liq xavotirlar ham mavjud. Urushning tezroq tugashidan barcha manfaatdor.
Albatta, voqealar rivoji qanday bo‘lishini oldindan aniq aytib bo‘lmaydi. Ko‘p narsa yetakchi mamlakat rahbarlarining o‘zaro muzokaralari chog‘ida hal bo‘lishi ham mumkin.
Joriy yil sentyabr oyida Samarqanda O‘zbekiston raisligida SHHTning navbatdagi Sammiti bo‘lib o‘tadi. Shuningdek, noyabrda Indoneziyada Katta yigirmalik davlatlar rahbarlari jam bo‘lishi kutilmoqda. Ajab emaski, mana shu tadbirlardagi yuzma-yuz muloqotlar chog‘ida urushning borishiga ta’sir ko‘rsatuvchi ko‘p masalalar hal qilinadi”, - dedi Farrux Hakimov.
Shuni ham alohida ta'kidlash kerakki, Vladimir Zelenskiy Rossiya yaqin orada Ukrainaga raketa hujumlarini kuchaytirishi mumkinligi haqidagi xabarlarga munosabat bildira turib: "Agar ular bizga zarba berishni boshlashsa, kuchli javob qabul qilib olishadi", - dedi.
Izoh (0)