Marhum qiziqchi Hojiboy Tojiboyevning kenja qizi Madina Tojiboyeva “Omon-omon” ko‘rsatuviga bergan intervyusida o‘z hamkasbi, Uztim taxallusi ostida ijod qiladigan xonanda va aktyor Islom Mansurov bilan oila qurayotgani haqida gapirdi.
Ijtimoiy tarmoqda tanishgan juftlik
“To‘g‘risini aytsam biz munosabatlarimizni ommaga e’lon qilmoqchi emas edik. Shu kungacha yurdim, ijod qildim, o‘ynadim, kuldim, sevgi mavzusiga to‘xtalmagandim. Keyin uydagilar ham uylanmaysanmi, deb boshimni og‘ritishdi. Vaqti keladi, mayli, deb to‘g‘ri kelganga uylanib bo‘lmaydi.
Madinani ko‘rib yuragim jiz etdi. Keyinroq gaplashib ketganmiz, “Bigo live” degan platforma bor, shunda jonli efir qilayotgan vaqtimda Madina yozib qolgan. Keyin qarasam Madina Tojiboyeva deb yozilgan ekan, shunda siz Intizorning singlisimisiz, nima uchun sizni ko‘rmaganman deb so‘raganman.
Madina esa men otamning kenja qiziman, hech qayerda chiqmayman degan. Keyin uning o‘zi ham sahifa ochdi, birga ishladik. Yuragim jiz etgani uchun, bir hafta bo‘lmay unga sevgi izhor qildim. Vaqti o‘tib unga sen uchun Toshkentga boraman desam ishonmadi. Kelib-ko‘rishdim, bir-birimizga e’tibor qilishni boshladik”, — deydi xonanda.
Madina Tojiboyeva esa Islom Mansurovning munosabatlarini ko‘p rad etganini, xonanda unga aytmasdan uyiga sovchi jo‘natgani va bu taklif uydagilariga ma’qul bo‘lganidan keyin munosabatlarga ishonch bildirganini aytgan.
“Men ularga ko‘p rad javobini berdim, keyin bu inson menga aytmasdan katta opam bilan gaplashib onasini uyimizga jo‘natgan, uyimdagilar buni bilgan, men bilmaganman. Keyin uyimdagilar aytib qoldi, Islomjondan sovchi keldi, ular bizga yoqdi, gaplashib ko‘r, o‘zi nimaga rad javobini berib yuribsan, uning oyisi siqilib yurgan ekan degan gaplardan keyin men shu narsaga ishonch bildirishga qaror qildim. Demak, rost ekan, shunchaki bo‘lganda onasini yubormas edi, deb o‘yladim.
Bundan tashqari xonanda Madina Tojiboyeva bilan birga ijod qilishini, musiqa yo‘nalishida ham faoliyat yuritishini aytib o‘tgan.
“Biz juftlik bo‘lib musiqa aytmoqchimiz. Hozirgi kunda taronalarimiz yaxshi bastakorlarimiz tomonidan bastalanmoqda. Nom qo‘ymaymiz. Borligimizcha chiqamiz”, — deydi Islom Mansurov.
Madina Tojiboyeva san’atga qiziqish bilan kirib kelgani haqida
“San’atga kirishga qaror qildim. Onam oliygohga topshir, o‘qi qizim, bizning oilamizda hamma o‘qigan, sen ham o‘qishing kerak degan fikrni bildirdi. Yoshlikdan bitta oilaga bitta san’atkor yetadi deb o‘ylab yurardim, otamning izdoshi bitta Intizor opam bo‘lsa yetadi deb o‘ylaganman. Keyinchalik o‘ylab qarasam mening ham san’atga qiziqishlarim katta, ortib bormoqda, bari bir shu yo‘nalishga kirdim. Qonda bor, torib ketdi”, — deydi Madina Tojiboyeva.
Mavzuga doir:
Izoh (0)