Turkiyaning dunyoga mashhur aktrisalaridan biri Demet Evgar 2022-yilning 18-avgust kuni qiz farzandli bo‘ldi. Bu haqda turk ommaviy axborot vositalari xabar berdi.
Hozirda 42 yoshda bo‘lgan Demet Evgar 2022-yil 17-mart kuni unga 6 yildan beri tanish bo‘lgan tadbirkor Levent Babatash bilan turmush qurgan.
Aktrisa ijtimoiy tarmoqlardagi sahifalariga homiladorlik paytidagi suratlarini joylab borgan. U turk ommaviy axborot vositalarining biriga bergan intervyusida semirishdan qo‘rqmasligini, turmush o‘rtog‘i uni har qanday holatda ham qo‘llab-quvvatlashini, jismoniy holati uning homiladorligiga ham ta’sir qilishini aytgan.
Demet Evgar faoliyati davomida 25 ta loyihada ishtirok etgan. Aktrisa “Yorqin alanga” serialida zulmkor turmush o‘rtog‘iga qarshilik ko‘rsatishga uringan, sevgisini topishga, uni himoya qilishga, adolatga erishishga, jamiyatni psixologik va jismoniy muammolarga e’tibor qaratishga majburlagan ayol — Jemre Kayabeli rolini o‘ynagan.
Demet Evgar nafaqat mashhur kino aktrisasi, balki ajoyib teatr aktrisasi ham hisoblanadi. U 17 yoshida Manisadagi Afsem teatriga havaskor sifatida borgan. Aktrisa Istanbul davlat konservatoriyasining teatr bo‘limida tahsil olayotganda ham sahnada rol o‘ynashni davom ettirgan.
Uning ishtirokidagi “Anna Karenina”, “Basamak” spektakllari teatr sohasida beriladigan mashhur mukofotlar bilan taqdirlangan. Mehmet Birkiye boshchiligida sahnalashtirilgan “Cimri” spektaklidagi Eliza roli uchun esa u 2010 yilda 8-teatr sohasidagilarni mukofotlash marosimida “Yil aktrisasi” mukofotiga sazovor bo‘ldi.
Jahon miqyosidagi durdona asarlarda, jumladan, “Makbet” va “Qirol Lir” kabi teatrlashtirilgan spektakllarda ishtirok etish Demetga yaxshi aktyorlik mahoratini egallashga va murakkab rollarni muvaffaqiyatli ijro etishga yordam berdi.
Teatrda egallagan mahorati tufayli aktrisa kino sanoatidagi faoliyatini ham muvaffaqiyatli boshladi. Demet bir necha mavsumdan iborat “Erkak va ayol” serialidagi ishtiroki tufayli Turkiya kino olamida yuksak e’tirof va mashhurlikka erishdi. U ushbu serialda bosh rolni, ya’ni Zeynep ismli obrazni gavdalantirdi.
Seriallar va filmlardagi ishtiroki uchun Demet Evgar bir necha bor televideniye yo‘nalishida va kino sohasida beriladigan mukofotlarga sazovor bo‘lgan. “Hovli”, “Oshxona stoli” kabi loyihalarida ishtirok etish esa aktrisaning ko‘p qirrali iste’dod egasi ekanidan dalolat beradi. U “Hovli” teleserialida qizini yo‘qotgan mahbus rolini ijro etgan.
“Oshxona stoli” loyihasida esa u qotillika qo‘l urgan uy bekasi obrazini gavdalantirgan.
Bundan tashqari, aktrisa xonandalikda ham o‘zini sinab ko‘rgan. Uning muxlislari ham aktrisaning yaxshi qo‘shiq kuylashi haqida gapirgan.
Izoh (0)