Ta’lim inspeksiyasi litsenziyaga ega bo‘lmagan OTMlardan ogoh bo‘lishga chaqirdi

Ta’lim sifatini nazorat qilish davlat inspeksiyasi litsenziyaga ega bo‘lmay turib faoliyat olib bormoqchi bo‘lgan oliy ta’lim muassasalaridan ogohlantirdi.

Ma’lum qilishicha, so‘nggi paytlarda Ta’lim inspeksiyasiga ayrim fuqarolar Yangiyo‘l shahridagi “Mumtozbegim Shoxsaroyi pedagogika universiteti tomonidan berilgan diplomlar O‘zbekistonda OTM diplomi sifatida tan olinadimi?”, deb murojaat qilmoqda. Shuningdek, tegishli vazirliklar tomonidan ushbu muassasa nodavlat oliy ta’lim tashkiloti sifatida reklama qilinayotgani bo‘yicha e’tirozlar bildirilgan.

Inspeksiya xabariga ko‘ra, mazkur tashkilotning nodavlat oliy ta’lim xizmatlari faoliyatini boshlash maqsadida Maxsus elektron tizim orqali Ta’lim inspeksiyasiga murojaat qilgan. Biroq talabgor tomonidan Vazirlar Mahkamasining 2022-yil 21-fevraldagi 80-son qarori bilan belgilangan ayrim faoliyat turlarini litsenziyalash tartibi to‘g‘risida yagona nizomi talablariga javob bermagani sababli ushbu ariza rad etilgan.

Ushbu tashkilot bugungi kunda nodavlat maktabgacha ta’lim xizmatlarini ko‘rsatish bo‘yicha litsenziyaga ega bo‘lib, Maktabgacha ta’lim vazirligi tomonidan “Mumtozbegim Shoxsaroyi” NTM bilan tuzilgan davlat-xususiy sherikchilik to‘g‘risidagi bitimga muvofiq, nodavlat OTM tashkil etilishi rejalashtirilayotgan binoda maktabgacha ta’limdan boshqa turdagi ta’lim xizmatlarini ko‘rsatilishi taqiqlanishi ma’lum qilingan.

“Mazkur holatni o‘rganib chiqish va qonunchilikda belgilangan tartibda chora ko‘rish uchun Ta’lim inspeksiyasi tomonidan huquqni muhofaza qiluvchi organlarga murojaat yuborilganligini ma’lum qilamiz.

Ta’kidlash lozim, qonun hujjatlarida belgilangan talablarga muvofiq, Ta’lim inspeksiyasidan oliy ta’lim xizmatlari ko‘rsatish uchun litsenziya olmagan nodavlat oliy ta’lim tashkilotlari tomonidan berilgan diplomlar tan olinmaydi”, — deyiladi inspeksiya xabarida.

Ta’kidlanishicha, “Ta’lim to‘g‘risida”gi qonunning 29-moddasiga asosan, nodavlat ta’lim tashkilotlari litsenziya olingan kundan e’tiboran ta’lim faoliyati bilan shug‘ullanishga haqlidir.

Fuqarolarining yuqoridagi kabi holatlarda aldanib qolishlarining oldini olish maqsadida Ta’lim sifatini nazorat qilish davlat inspeksiyasi veb-saytiga nodavlat oliy ta’lim tashkilotlari ro‘yxati joylashtirilib, bu yerga litsenziya olgan ta’lim tashkilotlari haqidagi ma’lumotlar muntazam yangilanib borilmoqda.

Mavzuga doir: Ta’lim inspeksiyasi davlat litsenziyasiga ega bo‘lmagan xorij universitetlar nomini ma’lum qilib, fuqarolarni ogohlikka chaqirdi