Таълим сифатини назорат қилиш давлат инспекцияси лицензияга эга бўлмай туриб фаолият олиб бормоқчи бўлган олий таълим муассасаларидан огоҳлантирди.
Маълум қилишича, сўнгги пайтларда Таълим инспекциясига айрим фуқаролар Янгийўл шаҳридаги «Мумтозбегим Шохсаройи педагогика университети томонидан берилган дипломлар Ўзбекистонда ОТМ дипломи сифатида тан олинадими?», деб мурожаат қилмоқда. Шунингдек, тегишли вазирликлар томонидан ушбу муассаса нодавлат олий таълим ташкилоти сифатида реклама қилинаётгани бўйича эътирозлар билдирилган.
Инспекция хабарига кўра, мазкур ташкилотнинг нодавлат олий таълим хизматлари фаолиятини бошлаш мақсадида Махсус электрон тизим орқали Таълим инспекциясига мурожаат қилган. Бироқ талабгор томонидан Вазирлар Маҳкамасининг 2022 йил 21 февралдаги 80-сон қарори билан белгиланган айрим фаолият турларини лицензиялаш тартиби тўғрисида ягона низоми талабларига жавоб бермагани сабабли ушбу ариза рад этилган.
Ушбу ташкилот бугунги кунда нодавлат мактабгача таълим хизматларини кўрсатиш бўйича лицензияга эга бўлиб, Мактабгача таълим вазирлиги томонидан «Мумтозбегим Шохсаройи» НТМ билан тузилган давлат-хусусий шерикчилик тўғрисидаги битимга мувофиқ, нодавлат ОТМ ташкил этилиши режалаштирилаётган бинода мактабгача таълимдан бошқа турдаги таълим хизматларини кўрсатилиши тақиқланиши маълум қилинган.
«Мазкур ҳолатни ўрганиб чиқиш ва қонунчиликда белгиланган тартибда чора кўриш учун Таълим инспекцияси томонидан ҳуқуқни муҳофаза қилувчи органларга мурожаат юборилганлигини маълум қиламиз.
Таъкидлаш лозим, қонун ҳужжатларида белгиланган талабларга мувофиқ, Таълим инспекциясидан олий таълим хизматлари кўрсатиш учун лицензия олмаган нодавлат олий таълим ташкилотлари томонидан берилган дипломлар тан олинмайди», — дейилади инспекция хабарида.
Таъкидланишича, «Таълим тўғрисида»ги қонуннинг 29-моддасига асосан, нодавлат таълим ташкилотлари лицензия олинган кундан эътиборан таълим фаолияти билан шуғулланишга ҳақлидир.
Фуқароларининг юқоридаги каби ҳолатларда алданиб қолишларининг олдини олиш мақсадида Таълим сифатини назорат қилиш давлат инспекцияси веб-сайтига нодавлат олий таълим ташкилотлари рўйхати жойлаштирилиб, бу ерга лицензия олган таълим ташкилотлари ҳақидаги маълумотлар мунтазам янгиланиб борилмоқда.
Мавзуга доир: Таълим инспекцияси давлат лицензиясига эга бўлмаган хориж университетлар номини маълум қилиб, фуқароларни огоҳликка чақирди
Изоҳ (0)