Ijtimoiy tarmoqlarda Qoraqalpog‘istonda somon ortilgan tirkama yonib ketgani aks etgan video tarqaldi. Mahalliy nashrlarning xabar berishicha, holat 20-avgust kuni Xo‘jayli tumanida yuz bergan.
Guvohlarga ko‘ra, tirkama ulangan traktordan uchqun chiqishi oqibatida yonib ketgan.
Holat yuzasidan Qoraqalpog‘iston Respublikasi FVB rasmiy ma’lumot berdi.
Qayd etilishicha, 20-avgust kuni soat 18:20 larda Xo‘jayli tumani “Abat” MFY hududida Xo‘jayli ko‘chasida harakatlanib borayotgan T-40 markali traktor tirkamasida yong‘in kelib chiqqanligi bo‘yicha 101 raqamiga chaqiruv kelib tushgan.
Chaqiruv bo‘yicha favqulodda vaziyatlar bo‘limi Xo‘jayli tumani 2-yong‘in-qutqaruv ekipaji voqea joyiga chiqib, yong‘inni bartaraf etgan.
Yong‘in oqibatida 1989-yil tug‘ilgan fuqaro A.D. boshqaruvidagi traktor tirkamasida jami 150 dona (siqilgan) preslangan o‘t-cho‘p yonib ketgan. Dastlabki taxminlarga ko‘ra, yong‘inga traktorning ovoz qaytargichiga alohida uchqun so‘ndirgich qurilmasi o‘rnatilmagani sababli uchqun paydo bo‘lgan.
Qo‘shimcha qilinishicha, yong‘inning aniq sababi va zarar miqdori surishtiruvlar davomida aniqlanadi.
Izoh (0)