Rossiyalik tergovchilar fikricha, faylasuf va siyosatshunos Aleksandr Duginning avtomobili masofadan turib portlatilgan. Bu haqda “TASS” huquq-tartibot organlaridagi manbasiga tayanib xabar berdi.
“Duginaning mashinasidagi bomba masofadan turib harakatga keltirilgani aniqlandi. Avtomobil kuzatilgani va uning harakatlanishi nazorat qilingani taxmin etilmoqda”, — dedi manba.
MASH nashri da’vo qilishicha, Dugina boshqarib ketayotgan avtomobil kimga tegishli ekani noma’lum bo‘lgan telefonlar orqali kuzatilgan. Nashr ma’lumotlariga ko‘ra, shunday telefonlardan biri orqali bo‘lgan qo‘ng‘iroqdan keyin avtomobildagi portlovchi qurilma ishlab ketgan.
29 yoshli Darya Dugina 20-avgust kuni kechqurun Moskva viloyatida halok bo‘ldi — u haydab ketayotgan Toyota Land Cruiser Prado yo‘ltanlamas avtomobili portlab ketdi. Baza va “Kommersant” yozishicha, hodisa versiyalari orasida Aleksandr Duginga suiqasd varianti ham bor.
Aleksandr Dugin — faylasuf va siyosatshunos bo‘lib, “yevrosiyochilik”, Rossiyaning sobiq sovet respublikalari bilan integratsiyalashuvi orqali o‘ta kuchli davlat tuzish g‘oyalarini ilgari suradi. Amerika OAVlari Aleksandr Duginni ko‘p bora “Putinning miyasi” deb atagan.
U Ukrainaga Rossiya qo‘shinlari kiritilishi va uning deyarli butun hududini bosib olishni yoqlab chiqqan. 2015-yil martidan buyon u Ukrainadagi voqealar tufayli AQSH sanksiyalar ro‘yxatiga kiritilgan. Bundan tashqari, Kanada va Avstraliya ham Duginga qarshi sanksiyalar joriy qilgan.
Darya Dugina otasining g‘oyalari tarafdori bo‘lgan va u ham jamoatchilik faoliyati bilan shug‘ullangan.
Izoh (0)