Россиялик терговчилар фикрича, файласуф ва сиёсатшунос Александр Дугиннинг автомобили масофадан туриб портлатилган. Бу ҳақда «ТАСС» ҳуқуқ-тартибот органларидаги манбасига таяниб хабар берди.
«Дугинанинг машинасидаги бомба масофадан туриб ҳаракатга келтирилгани аниқланди. Автомобиль кузатилгани ва унинг ҳаракатланиши назорат қилингани тахмин этилмоқда», — деди манба.
MASH нашри даъво қилишича, Дугина бошқариб кетаётган автомобиль кимга тегишли экани номаълум бўлган телефонлар орқали кузатилган. Нашр маълумотларига кўра, шундай телефонлардан бири орқали бўлган қўнғироқдан кейин автомобилдаги портловчи қурилма ишлаб кетган.
29 ёшли Дарья Дугина 20 август куни кечқурун Москва вилоятида ҳалок бўлди — у ҳайдаб кетаётган Toyota Land Cruiser Prado йўлтанламас автомобили портлаб кетди. Baza ва «Коммерсантъ» ёзишича, ҳодиса версиялари орасида Александр Дугинга суиқасд варианти ҳам бор.
Александр Дугин — файласуф ва сиёсатшунос бўлиб, «евросиёчилик», Россиянинг собиқ совет республикалари билан интеграциялашуви орқали ўта кучли давлат тузиш ғояларини илгари суради. Америка ОАВлари Александр Дугинни кўп бора «Путиннинг мияси» деб атаган.
У Украинага Россия қўшинлари киритилиши ва унинг деярли бутун ҳудудини босиб олишни ёқлаб чиққан. 2015 йил мартидан буён у Украинадаги воқеалар туфайли АҚШ санкциялар рўйхатига киритилган. Бундан ташқари, Канада ва Австралия ҳам Дугинга қарши санкциялар жорий қилган.
Дарья Дугина отасининг ғоялари тарафдори бўлган ва у ҳам жамоатчилик фаолияти билан шуғулланган.
Изоҳ (0)