BAA elchisi Eronga qaytmoqda. U olti yil avval chaqirib olingan

Birlashgan Arab Amirliklari (BAA) olti yil ichida birinchi marta Eronga o‘z elchisini qaytarishni rejalashtirmoqda, deb yozadi The Times of Israel.

Bu haqda Amirlik Tashqi ishlar vazirligi e’lon qilgan. Ayni payta Fors ko‘rfazi va arab davlatlari federatsiyasi ular uzoq vaqtdan beri mintaqaviy tahdid deya hisoblab keladigan Eron bilan aloqalarni yaxshilash bo‘yicha sa’y-harakatlarni kuchaytirmoqda.

“Amirlikning Erondagi elchisi Sayf Muhammad al-Zaabi yaqin kunlarda Tehronga qaytib, ikki qo‘shni va mintaqaning umumiy manfaatlariga erishish uchun ikki tomonlama munosabatlarni olg‘a siljitishda davom etadi”, — deb xabar qildi BAA davlat axborot agentligi WAM.

Nashrning ta’kidlashicha, Fors ko‘rfazi davlatlari va Eron o‘rtasidagi aloqalarni mustahkamlash Isroil—BAA kelishuvlariga ta’sir ko‘rsatishi mumkin, chunki Isroil imkon qadar Eron rejimiga xalqaro bosim o‘tkazishga harakat qilmoqda.

BAA Saudiya Arabistoni bilan birdamlik sifatida 2016-yilda Eron bilan aloqalarini vaqtincha ishlar vakili darajasiga pasaytirgan va o‘z pozitsiyasini “Tehronning Fors ko‘rfazi va arab davlatlarining ichki ishlariga aralashuvda davom etayotgani” bilan izohlagan.