«Ал-Қоида» ташкилотига алоқадор «Аш-Шабаб» жангарилари Сомали пойтати Могадишудаги Hayat меҳмонхонасини эгаллаб олиши оқибатида камида 30 киши ҳалок бўлди, ўнлаб кишилар яраланди, деб ёзмоқда Somali Guardian нашри. Associated Press хабарига кўра эса, камида 20 киши ҳалок бўлган, 40 га яқин одам жароҳатланган.
Ўлдирилганлар орасида собиқ амалдорлар, давлат хизматчилари ва маънавият етакчилари ҳам бор, деб ёзади нашр. Сомали разведка ва хавфсизлик агентлигининг Могадишудаги раҳбари ҳамда юқори мартабали полиция ходими яраланган.
Somali Guardian нашрига кўра, гуруҳнинг уч нафар аъзоси меҳмонхонага бостириб кирган. Ҳужум вақтида улар портловчи қурилмалардан ҳам фойдаланган. «Аш-Шабаб» ҳарбий вакили Абу Мусабнинг айтишича, ҳужумда 20 дан ортиқ одам, жумладан, расмийлар ҳам ҳалок бўлган —бу май ойида Сомалида Ҳасан Шайх Муҳаммад президент этиб қайта сайланганидан бери пойтахтда содир бўлган биринчи ҳужумдир.
Ҳозирча қурбонларнинг шахси ҳақида ҳеч нарса маълум эмас, аммо маълумотлар аста-секин уларнинг оила аъзоларига етиб бормоқда.
Сайланганидан бир неча ҳафта ўтиб, Сомали президенти «Аш-Шабаб»ни тор-мор этишга, унинг маъмурияти Могадишодаги Ғарб томонидан қўллаб-қувватланган ҳукуматни ағдариш учун сўнгги 15 йил давомида курашиб келаётган ушбу гуруҳга қарши кенг қамровли милитаристик, иқтисодий ва мафкуравий ҳужум бошлашига ваъда берганди.
Изоҳ (0)