Vashingtonda Moskvaning Soho Rooms klubi asoschisi, biznesmen va investor Den Rapoport vafot etdi, deb yozadi Meduza.
52 yoshli Rapoportning o‘limi qay holatda yuz bergani noma’lum. Rapoportning vafoti haqida birinchi bo‘lib xabar bergan jurnalist Yuniya Pugachyova biznesmen o‘z joniga qasd qilganini da’vo qildi — bundan oldin u, go‘yoki, itiga o‘limidan oldin yozilgan xatni bog‘lab, xiyobonga qo‘yib yuborgan. Jurnalistning aytishicha, u yaqinda rafiqasi, ukrainalik Alyona Rapoport bilan ajrashgan.
Alyona Rapoport esa o‘z joniga qasd qilish versiyasini rad etdi, shuningdek, u turmush o‘rtog‘i bilan ajrashmaganini ta’kidladi. Ayni paytda biznesmenning o‘limi sabablari o‘rganilmoqda.
Vashington politsiyasi ma’lum qilishicha, ayni paytda biznesmen o‘ldirilgan, deb hisoblanilmayapti. Politsiya hisobotida aytilishicha, 14-avgust kuni o‘z joniga qasd qilgan erkak haqida ma’lumot olingan. Voqea joyiga tez yordam yetib kelib, Rapoportni kasalxonaga olib ketgan, u yerda shifokorlar o‘lim yuz berganini qayd etgan. Marhumning yonidan ko‘zoynak, buzilgan mobil telefon, haydovchilik guvohnomasi va 2620 dollar naqd pul topilgan.
Rapoport 1970-yilda Rigada tug‘ilgan. 10 yoshida oilasi AQSHga emigratsiya qilgan. 1990-yillarda u Rossiyaga kelib, investitsion bankirga aylangan. 2007-yilda Rapoprt sheriklari bilan birga Soho Rooms klubiga asos solgan.
2012-yilda Rapoport AQSHga ketgan — versiyalardan biriga ko‘ra, Rossiya muxolifati bilan aloqalari tufayli unga bosim o‘tkaza boshlashgan: xususan, biznesmen 2010-yildan buyon Aleksey Navalniyni qo‘llab-quvvatlab kelgan. 2016-yilda Rapoport Kiyevga ko‘chib o‘tgan va u yerda ikkinchi marta uylangan. Vashingtondagi uyini u AQSH prezidenti Donald Trampning qizi Ivankaga sotgan.
2018-yilda Bellingcat tadqiqot loyihasi Rapoport Devid Jubergning yaratuvchilaridan biri bo‘lishi mumkinligi haqida yozgandi, u to‘qib chiqarilgan “Pentagonning Rossiya bo‘yicha bosh tahlilchisi” bo‘lib, OAVlarda Rossiya hukumatining obro‘li tanqidchisi sifatida iqtibos berilardi. Ukraina bilan urush boshlanganidan keyin biznesmen ijtimoiy tarmoqlardagi sahifalarida va OAVlar uchun bergan izohlarida Rossiyaning xatti-harakatlarini ochiqdan-ochiq tanqid qilib kelgan edi.
Izoh (0)