Сўнгги уч кун ичида Ҳиндистон шимоли ва шарқида муссон ёмғирлари сабаб юзага келган сув тошқинлари ҳамда кўчкилар оқибатида камида 50 киши ҳалок бўлди. Бу ҳақда ғарб матбуотига таяниб, «Интерфакс» хабар бермоқда.
Хусусан, мамлакатнинг Уттаракханд штатида тўрт киши ҳалок бўлган, яна 13 киши бедарак йўқолган.
Мамлакат шарқидаги Жаркханд штатида Налкари дарёси ўзанидан тошиб, беш кишининг ҳаётига зомин бўлган, улардан тўрт нафарининг жасади топилган. Қўшни Одиша штатида эса расмийлар тинимсиз ёмғирлар остида олти киши ҳалок бўлганини қайд этди.
Шунингдек, Одишада ёмон об-ҳаво 800 минг кишига зарар етказган, минглаб аҳоли уйларини тарк этишга мажбур бўлган. Ёмғирлар электр ва сув оқимининг узилишига олиб келган ҳамда йўлларни вайрон қилган.
Оммавий ахборот воситаларининг эслатишича, август ойи бошида метеорологлар август ва сентябрь ойларидаги муссон мавсумида Ҳиндистонда ўртача ёғингарчиликнинг пасайишини прогноз қилганди. Шу сабаб Осиёда учинчи йирик иқтисодиётга эга Ҳиндистонда ҳосил яхши бўлиши кутилаётган эди. Қишлоқ хўжалиги Ҳиндистон иқтисодиётининг 15 фоизини ташкил қилади, мамлакатдаги 1,3 миллиарддан ортиқ аҳолининг ярмидан кўпи унга қарам ҳисобланади.
Изоҳ (0)