Россияликларга Шенген виза беришни тақиқлаш Украинадаги воқеалар муносабати билан Европа Иттифоқининг Россияга қарши санкциялари рўйхатига киритилиши керак, деди Чехия парламенти вакиллари. Хусусан, бундай баёнот Чехия парламенти юқори ва қуйи палаталари халқаро ишлар қўмиталари раислари Павел Фишер ва Марек Женишек томонидан берилган.
«Европа Иттифоқи мамлакатлари фуқаролари, шу жумладан, Чехия фуқаролари хавфсизлиги учун Россия Федерацияси фуқароларига Шенген визаларини бериш бутунлай тўхтатилиши керак», — дея Фишернинг сўзларидан иқтибос келтирган Чех радиоси.
Шу билан бирга, у «қўллаб-қувватловга муҳтож» россияликлар учун яшаш ва халқаро ҳимоя сўрови билан Европа давлатларига мурожаат қилиш ҳуқуқини сақлаб қолиш кераклигини айтган.
Қонунчи Женишек эса россияликларга Шенген виза берилишини тақиқлаш Европа Иттифоқининг Россияга қарши дастлабки санкцияларидан бири бўлиши керак эди, деган фикрда.
12 август куни Чехия Ташқи ишлар вазирлиги раҳбари Ян Липавский ҳам ушбу таклифни илгари сурган эди. Унинг тушунтиришича, Россия халқи «бундай жангари сиёсатнинг оқибатлари борлигини» тушуниши керак. Чехия ҳозирда Европа Иттифоқи кенгашига раислик қилмоқда, ташқи ишлар вазирлари йиғилишида Прага томонидан умумевропа визаси тўхтатилиши таклиф қилинади, деди вазир. Йиғилиш 31 августга белгиланган.
Чехия россияликларга визалар ва яшаш учун рухсатномалар беришни тўхтатган биринчи ЕИ давлати бўлганди, ушбу қарор 2023 йилнинг март ойи охирига қадар амал қилади. Расмий Прага ўз қарорини Россиянинг Украинадаги босқини муносабати билан Чехия Республикасининг ташқи сиёсатидаги манфаатларини ҳимоя қилиш ва Москвага босим ўтказиш билан изоҳлаган.
Ўз навбатида, Еврокомиссия Европа Иттифоқи россияликларга визалар беришни тўхтата олмаслиги ҳақида огоҳлантирган ва бундай чора иттифоқнинг виза кодексида кўзда тутилмаганини таъкидлаган.
Мавзуга доир: Эстония Шенген визаси бўлган россияликлар учун ўз чегарасини ёпади
Изоҳ (0)