Россияда фаолият юритган бизнесмен АҚШда ўлик ҳолда топилди, у Путинни кўп танқид қиларди

Вашингтонда Москванинг Soho Rooms клуби асосчиси, бизнесмен ва инвестор Дэн Рапопорт вафот этди, деб ёзади Meduza.

52 ёшли Рапопортнинг ўлими қай ҳолатда юз бергани номаълум. Рапопортнинг вафоти ҳақида биринчи бўлиб хабар берган журналист Юния Пугачёва бизнесмен ўз жонига қасд қилганини даъво қилди — бундан олдин у, гўёки, итига ўлимидан олдин ёзилган хатни боғлаб, хиёбонга қўйиб юборган. Журналистнинг айтишича, у яқинда рафиқаси, украиналик Алёна Рапопорт билан ажрашган.

Алёна Рапопорт эса ўз жонига қасд қилиш версиясини рад этди, шунингдек, у турмуш ўртоғи билан ажрашмаганини таъкидлади. Айни пайтда бизнесменнинг ўлими сабаблари ўрганилмоқда.

Вашингтон полицияси маълум қилишича, айни пайтда бизнесмен ўлдирилган, деб ҳисобланилмаяпти. Полиция ҳисоботида айтилишича, 14 август куни ўз жонига қасд қилган эркак ҳақида маълумот олинган. Воқеа жойига тез ёрдам етиб келиб, Рапопортни касалхонага олиб кетган, у ерда шифокорлар ўлим юз берганини қайд этган. Марҳумнинг ёнидан кўзойнак, бузилган мобил телефон, ҳайдовчилик гувоҳномаси ва 2620 доллар нақд пул топилган.

Рапопорт 1970 йилда Ригада туғилган. 10 ёшида оиласи АҚШга эмиграция қилган. 1990 йилларда у Россияга келиб, инвестицион банкирга айланган. 2007 йилда Рапопрт шериклари билан бирга Soho Rooms клубига асос солган.

2012 йилда Рапопорт АҚШга кетган — версиялардан бирига кўра, Россия мухолифати билан алоқалари туфайли унга босим ўтказа бошлашган: хусусан, бизнесмен 2010 йилдан буён Алексей Навальнийни қўллаб-қувватлаб келган. 2016 йилда Рапопорт Киевга кўчиб ўтган ва у ерда иккинчи марта уйланган. Вашингтондаги уйини у АҚШ президенти Дональд Трампнинг қизи Иванкага сотган.

2018 йилда Bellingcat тадқиқот лойиҳаси Рапопорт Дэвид Жубергнинг яратувчиларидан бири бўлиши мумкинлиги ҳақида ёзганди, у тўқиб чиқарилган «Пентагоннинг Россия бўйича бош таҳлилчиси» бўлиб, ОАВларда Россия ҳукуматининг обрўли танқидчиси сифатида иқтибос бериларди. Украина билан уруш бошланганидан кейин бизнесмен ижтимоий тармоқлардаги саҳифаларида ва ОАВлар учун берган изоҳларида Россиянинг хатти-ҳаракатларини очиқдан-очиқ танқид қилиб келган эди.