Belarus Ukrainadagi harbiy harakatlarda qatnashish uchun o‘z fuqarolarini yuborishiga hojat yo‘q, Minsk unga hech qanaqa hujumni rejalashtirayotgani yo‘q. Bu haqda respublika prezidenti Aleksanr Lukashenko Brest viloyatida fuqarolar bilan uchrashuvda aytib o‘tdi, deb yozadi “RBK”.
“Meni bu yerda qandaydir hujumni, masalan, Ukrainani Belarus hududida turib bombardimon qilishni rejalashtiryapti, deb o‘ylamang tag‘in. Sizning va mening farzandlarim urush qilishini umuman xohlamayman. Nimani deb? Biz o‘zimizni bosishimiz kerak”, — dedi Lukashenko.
Uning aytishicha, “bugungi kunda Ukraina hech qanday jang qilgani yo‘q — Rossiya butun NATO bloki va avvalo Amerika bilan jang qilyapti”. Agar AQSH Polsha yordamida jangovar harakatlarni tezlatishda davom etmaganida, Yevropa ham allaqachon bu nizoni to‘xtatgan bo‘lardi, dedi Belarus prezidenti.
Rossiya Ukrainadagi maxsus operatsiyasini 24-fevral kuni boshladi. Lukashenko maxsus operatsiya haqida gapirayotib, nizoni Belarus ham emas, Rossiya ham emas, balki respublikaga hujum tayyorlagan Ukraina kuchlari boshlaganini bir necha marta aytgan. Ular Belarus chegaralari yaqiniga “og‘ir raketa artilleriyasi”ni joylashtirgan, biroq Rossiya preventiv (oldini oluvchi) zarba berib, hujumning oldini olgan, dedi prezident.
Ayni vaqtda esa u Belarus nizoda ishtirok etmayotganini va buni rejalashtirmayotganini ham ko‘p bora ta’kidlagan.
Ukraina maxsus operatsiya boshlanganidan keyin harbiy holat e’lon qildi. Kiyev Moskva bilan diplomatik aloqalarini uzdi va agar Belarus qo‘shinlari Ukraina chegarasini kesib o‘tsa, Minskka nisbatan ham shunday yo‘l tutishi haqida ogohlantirdi.
Izoh (0)