Rossiya prezidenti Vladimir Putin va Xitoy rahbari Si Szinpin 16-sentabr kuni Shanxay hamkorlik tashkilotining O‘zbekistondagi sammitida uchrashuv o‘tkazishi mumkin, deb xabar bermoqda The Wall Street Journal.
AQSHning Xitoyga bosimi oshishi va AQSH Kongressi Vakillar palatasi spikeri Nensi Pelosining Tayvanga tashrifi tufayli, yetakchilarning uchrashuvi muddatidan oldin bo‘lib o‘tadi: dastlab ular Balidagi G20 sammitida ko‘rishishi kutilayotgan edi.
Xitoylik mansabdorlar so‘zlariga kora, Samarqandga safar, shuningdek, Si Szinpin G‘arbning Xitoyni tiyib turish bo‘yicha sa’y-harakatlariga qarshi turish uchun AQSH bilan ittifoqdosh bo‘lmagan mamlakatlar bilan xavfsizlik sohasida yaqin aloqalarni rivojlantirish maqsadiga urg‘u beradi.
Shu bilan birga, AQSH Ukraina bilan urush tufayli Rossiyaning Markaziy Osiyodagi ta’siri susayishi fonida ushbu mintaqada o‘z o‘rnini mustahkamlash haqida o‘ylayapti, deyiladi xabarda.
Avvalroq Rossiya prezidenti Vladimir Putin va Xitoy Xalq Respublikasi raisi Si Szinpin noyabr oyida Balida bo‘lib o‘tadigan G20 sammitida shaxsan ishtirok etishni rejalashtirayotgani haqida Indoneziya prezidenti Joko Vidodo ma’lum qilgandi.
Ma’lumot uchun, 15—16-sentabr kunlari Samarqand Shanxay hamkorlik tashkilotining navbatdagi sammitida mezbonlik qiladi.
Shanxay hamkorlik tashkilotining Samarqand sammiti Eron 2021-yil sentabrida tashkilotga to‘laqonli ishtirokchi sifatida qo‘shilganidan beri birinchisi bo‘ladi. SHHTga a’zo davlatlar: O‘zbekiston, Xitoy, Rossiya, Qozog‘iston, Qirg‘iziston, Tojikiston, Pokiston, Hindiston va Eron. Afg‘oniston, Mo‘g‘uliston va Belarus tashkilotda kuzatuvchi, Turkiya esa muloqot bo‘yicha hamkor sifatida ishtirok etadi.
Sammitda tashkilotga a’zo ko‘plab davlatlar bilan umumiy chegaraga ega Afg‘onistondagi vaziyat har tomonlama muhokama qilinadi va muhim qarorlar qabul qilinishi kutilmoqda.
Izoh (0)