Rossiya prezidenti Vladimir Putin fransiyalik hamkasbi Emmanuel Makron bilan telefon orqali Ukraina atrofidagi vaziyatni muhokama qildi, deb yozadi “RBK”.
Putin, xususan, “Zaporojye AES hududi ukrainalik harbiylar tomonidan muntazam o‘qqa tutilayotgani”, bu “katta hududlarning radiatsiyaviy ifloslanishiga olib kelishi mumkin bo‘lgan katta ko‘lamli ofat xavfini yaratayotgani”ga e’tibor qaratdi.
“Prezidentlar AESga eng yaqin vaqtda MAGATE missiyasini yo‘naltirish muhimligini qayd etdi, ular u yerdagi haqiqiy vaziyatni baholagan bo‘lardi. Rossiya tomonidan agentlik inspektorlariga zarur hamkorlik ko‘rsatishga tayyorlik tasdiqlandi”, — deyiladi Kreml xabarida.
Bundan tashqari, Rossiya prezidenti Ukraina donini Qora dengiz portlaridan olib chiqish bo‘yicha bitimga hamda Rossiya mahsulotlari va o‘g‘itlarining dunyo bozorlariga eksportiga to‘xtalib o‘tdi va Rossiya eksporti uchun to‘siqlar saqlanib qolayotganini aytdi.
Telefon suhbati Fransiya tomoni tashabbusi bilan o‘tkazilgan. Prezidentlar muloqotni davom ettirishga kelishib olgan.
Ukrainada harbiy harakatlar boshlanganidan buyon Rossiya va Fransiya prezidentlari, Kreml xabariga ko‘ra, telefon orqali o‘ninchi marta suhbatlashgan. So‘nggi marta Putin va Makronning muloqoti haqida 28-may kuni ma’lum qilingan edi.
Zaporojye AES — Yevropadagi eng yirik atom elektr stansiyasi. U Energodar shahrida joylashgan. Mart oyidan buyon uni va butun shaharni Rossiya qo‘shinlari nazorat qilib kelmoqda. Avgust oyida stansiya bir necha marta o‘qqa tutildi. Ukraina va Rossiyada ushbu zarbalarda bir-birini ayblamoqda.
G7 mamlakatlari Moskvani zudlik bilan AES ustidan nazoratni Kiyevga qaytarishga chaqirdi, ushbu da’vatni yana 35 ta mamlakat qo‘llab-quvvatladi. BMT AESdan harbiylar va texnikani olib chiqib ketishni va u yerda qurolsizlantirilgan hudud yaratishni taklif qildi. O‘z navbatida, Rossiya nazorati ostidagi Zaporojye viloyati hukumati stansiya atrofida osoyishtalik rejimini e’lon qilishni taklif etdi.
Izoh (0)