O‘zbekistonda BAA kompaniyasi bilan toza ichimlik suvi ta’minoti sohasida innovatsion loyihalar amalga oshirish istiqbollari o‘rganilmoqda, deb xabar bermoqda “Dunyo” axborot agentligi.
Qayd etilishicha, O‘zbekistonning Birlashgan Arab Amirliklaridagi (BAA) elchisi Abdulaziz Aqqulov “Merlin Farms” kompaniyasining Sharja Amirligida joylashgan “akvaponika” usulida tashkil etilgan fermer xo‘jaligida bo‘ldi. Tashrif davomida kompaniyaning qishloq xo‘jaligidagi innovatsion yechimlari bilan yaqindan tanishildi.
Yaqin Sharq, Janubi-sharqiy Osiyo va Shimoliy Afrika mintaqalari cho‘l hududlarida oziq-ovqat, suv hamda uy-joy bilan bog‘liq innovatsion yechimlar ishlab chiquvchi “Merlin Farms” kompaniyasi dengiz suvlarini quyosh energiyasi bilan tuzsizlantirish tizimidan foydalangan holda iste’mol uchun yaroqli bo‘lgan suv ishlab chiqarish texnologiyasiga asos solgan.
Mazkur texnologiya yordamida sho‘r suvdan toza ichimlik suvi va quruq tuz ishlab chiqariladi. 15 ta quyosh batareyalari modulidan iborat bo‘lgan, har biri kengligi 1 metr va uzunligi 2,5 metr, yerdan 2 metr balandlikda joylashgan qurilmadan kuniga 0,45 metr kub suv olish imkoni mavjud. Sho‘r yerosti suvi hamda dengiz suvlaridan deyarli 150,000 milligram/litrgacha bo‘lgan iste’molga yaroqli suvni o‘zida jamlaydi.
Mazkur yo‘nalishdagi o‘zaro manfaatli hamkorlikni yo‘lga qo‘yish maqsadida sentabr oyida O‘zbekiston Innovatsion rivojlanish vazirligi delegatsiyasining BAAga tashrifi rejalashtirilgan.
Izoh (0)