Ўзбекистонда БАА компанияси билан тоза ичимлик суви таъминоти соҳасида инновацион лойиҳалар амалга ошириш истиқболлари ўрганилмоқда, деб хабар бермоқда «Дунё» ахборот агентлиги.
Қайд этилишича, Ўзбекистоннинг Бирлашган Араб Амирликларидаги (БАА) элчиси Абдулазиз Аққулов «Мерлин Фармс» компаниясининг Шаржа Амирлигида жойлашган «аквапоника» усулида ташкил этилган фермер хўжалигида бўлди. Ташриф давомида компаниянинг қишлоқ хўжалигидаги инновацион ечимлари билан яқиндан танишилди.
Яқин Шарқ, Жануби-шарқий Осиё ва Шимолий Африка минтақалари чўл ҳудудларида озиқ-овқат, сув ҳамда уй-жой билан боғлиқ инновацион ечимлар ишлаб чиқувчи «Мерлин Фармс» компанияси денгиз сувларини қуёш энергияси билан тузсизлантириш тизимидан фойдаланган ҳолда истеъмол учун яроқли бўлган сув ишлаб чиқариш технологиясига асос солган.
Мазкур технология ёрдамида шўр сувдан тоза ичимлик суви ва қуруқ туз ишлаб чиқарилади. 15 та қуёш батареялари модулидан иборат бўлган, ҳар бири кенглиги 1 метр ва узунлиги 2,5 метр, ердан 2 метр баландликда жойлашган қурилмадан кунига 0,45 метр куб сув олиш имкони мавжуд. Шўр ерости суви ҳамда денгиз сувларидан деярли 150,000 миллиграм/литргача бўлган истеъмолга яроқли сувни ўзида жамлайди.
Мазкур йўналишдаги ўзаро манфаатли ҳамкорликни йўлга қўйиш мақсадида сентябрь ойида Ўзбекистон Инновацион ривожланиш вазирлиги делегациясининг БААга ташрифи режалаштирилган.
Изоҳ (0)