Беларусь Украинадаги ҳарбий ҳаракатларда қатнашиш учун ўз фуқароларини юборишига ҳожат йўқ, Минск унга ҳеч қанақа ҳужумни режалаштираётгани йўқ. Бу ҳақда республика президенти Алексанр Лукашенко Брест вилоятида фуқаролар билан учрашувда айтиб ўтди, деб ёзади «РБК».
«Мени бу ерда қандайдир ҳужумни, масалан, Украинани Беларусь ҳудудида туриб бомбардимон қилишни режалаштиряпти, деб ўйламанг тағин. Сизнинг ва менинг фарзандларим уруш қилишини умуман хоҳламайман. Нимани деб? Биз ўзимизни босишимиз керак», — деди Лукашенко.
Унинг айтишича, «бугунги кунда Украина ҳеч қандай жанг қилгани йўқ — Россия бутун НАТО блоки ва аввало Америка билан жанг қиляпти». Агар АҚШ Польша ёрдамида жанговар ҳаракатларни тезлатишда давом этмаганида, Европа ҳам аллақачон бу низони тўхтатган бўларди, деди Беларусь президенти.
Россия Украинадаги махсус операциясини 24 февраль куни бошлади. Лукашенко махсус операция ҳақида гапираётиб, низони Беларусь ҳам эмас, Россия ҳам эмас, балки республикага ҳужум тайёрлаган Украина кучлари бошлаганини бир неча марта айтган. Улар Беларусь чегаралари яқинига «оғир ракета артиллерияси»ни жойлаштирган, бироқ Россия превентив (олдини олувчи) зарба бериб, ҳужумнинг олдини олган, деди президент.
Айни вақтда эса у Беларусь низода иштирок этмаётганини ва буни режалаштирмаётганини ҳам кўп бора таъкидлаган.
Украина махсус операция бошланганидан кейин ҳарбий ҳолат эълон қилди. Киев Москва билан дипломатик алоқаларини узди ва агар Беларусь қўшинлари Украина чегарасини кесиб ўтса, Минскка нисбатан ҳам шундай йўл тутиши ҳақида огоҳлантирди.
Изоҳ (0)