Estoniya Rossiyaga qarshi sanksiyalarning sakkizinchi paketini kiritishni taklif qiladi

Estoniya Yevroittifoqqa Rossiyaga qarshi sanksiyalarning sakkizinchi paketini kiritishni taklif qiladi. Bu haqda Estoniya tashqi ishlar vaziri Urmas Reynsalu ma’lum qildi, deb yozadi “RBK”.

Vazirning so‘zlariga ko‘ra, bunday qaror yaqinda bo‘lib o‘tgan mamlakat hukumati yig‘ilishida qabul qilingan. Estoniya Rossiyaga qarshi iqtisodiyot, energetika va savdo sohalaridagi sanksiyalarni kengaytirishni hamda Yevropa sanksiya ro‘yxatlariga yangi kompaniyalar va ko‘proq jismoniy shaxslarni kiritishni taklif qilmoqchi. Tallin, Reynsaluning so‘zlariga ko‘ra, Rossiya fuqarolariga qarshi xuddi Estoniya qilgani kabi qo‘shimcha sanksiyalar kiritilishi uchun butun Shengen viza Makoni bo‘yicha siyosiy konsensusga erishish ustida ishlamoqda.

18-avgust kuni Estoniya o‘zi avvalroq Shengen vizalarini bergan rossiyaliklarni kiritmay qo‘ydi. Endi faqat diplomatik viza egalari, xalqaro tashuvlar sohasi ishchilari, Estoniyada qarindoshi bo‘lganlar va yana boshqa toifadagi fuqarolargina mamlakatga kirishi mumkin. Bundan tashqari, rossiyaliklar hozircha Estoniya Shengeni bilan Yevroittifoqning boshqa mamlakatlariga kira oladi, agar Yevroittifoqning boshqa davlatidan olingan Shengen vizasi bo‘lsa, u holda Estoniyaga ham kirish mumkin.

Avvalroq Litva va Finlyandiya ham rossiyaliklar uchun turli cheklovlar haqida kelishib olgandi. Latviya hukumati avvalroq rossiyaliklarga berilgan istiqomat guvohnomasi muddatini uzaytirmaslikka va Shengen vizasi bilan Latviyaga kirishni cheklashga qaror qildi. Finlyandiya esa sentabrdan viza uchun so‘rovlarni ko‘rib chiqishni o‘n marotaba qisqartirishini e’lon qildi.

Rossiya Yevroittifoq mamlakatlarining ushbu qarorlarini izohlar ekan, ularni rossiyalikalrga nisbatan diskriminatsion deb atadi.

Rossiya Ukrainada maxsus harbiy operatsiya boshlaganidan buyon, Yevroittifoq Moskvaga qarshi sanksiyalarning yettita paketini joriy qildi. So‘nggi marta Bryussel 22-iyul kuni cheklovlar kiritgan edi.

Moskva do‘st bo‘lmagan mamlakatlarning xatti-harakatlariga nisbatan o‘zining cheklov choralarini kiritdi.