Тошкент аэропортининг маҳаллий ва халқаро авиақатнов терминаллари ўртасида автобус қатнови йўлга қўйилди. Бу ҳақда Uzbekistan Airports матбуот хизмати хабар берди.
UzPort стикерли автобус ҳар куни соат 05:00 дан 23:30 гача хизмат кўрсатади.
Биз йўловчилардан терминалларни бир-бирига боғлаш билан боғлиқ кўплаб мурожаатлар олдик. Йўловчилар айрим ҳолларда терминалларда адаштириб нотўғри терминалга келишади — дейди Uzbekistan Airports.
Компания матбуот хизматининг айтишича, шаҳардаги терминаллар ораси 4 километрни ташкил қилади ва таксидан фойдаланиш доим ҳам ҳамма учун қулай бўлмаслиги мумкин.
Ушбу вазиятни инобатга олган ҳолда, Uzbekistan Airports терминаллараро қатновчи автобусни тест режимида йўлга қўйишга қарор қилди, — дея изоҳ берди компания.
Терминаллараро транспорт ҳар соатда жадвалга мувофиқ ҳаракатланади.
Халқаро авиақатновлар терминалида автобус жўнаб кетиш зали ёнидаги тўхташ жойида автобуслар учун ажратилган йўлак бўйлаб ҳаракатланади, маҳаллий терминалда эса кириш эшиги ёнигача боради.
Автобус хизматларидан барча хоҳловчилар мутлақо бепул фойдаланиши мумкин.
Аввалроқ Ўзбекистондаги аэропортларнинг умумий фойдаси маълум бўлган эди.
Компаниянинг 2022 йилнинг биринчи ярмидаги умумий даромади 513,8 млрд сўмни ташкил этди.
Изоҳ (0)