Sirdaryo viloyatida ayollarni o‘qitish va ularning biznes g‘oyalarini qo‘llab-quvvatlash bo‘yicha yangi loyiha — InnoWoman ishga tushirilmoqda. Bu haqda IT Park xabar bermoqda.
Loyiha 15 yoshdan 35 yoshgacha bo‘lgan kompyuter ko‘nikmalarini egallashni orzu qiladigan qizlar va ayollar uchun IT-kursidir.
Dastur 1 000 nafar talaba qizlarni kommunikatsiya va axborot texnologiyalari sohasida taklif etilayotgan kurslarda o‘qitish hamda amaliy ko‘nikmalarni rivojlantirishga qaratilgan.
InnoWoman loyihasi 6 oy davom etadi. Dastur doirasida qizlar va ayollar quyidagi yo‘nalishlarda o‘qiydi:
- Kompyuter savodxonligi (1 oy);
- Veb-dasturlash va loyihalarni boshqarish (5 oy).
Darslar 20-sentabrdan boshlanadi va o‘zbek tilida o‘tkaziladi. O‘tkaziladigan joy — IT Park’ning Sirdaryo filiali, hamda mintaqaviy IT-markazlar.
InnoWoman doirasidagi kurslar uchun maxsus narxlar belgilanadi — kurslarning oylik narxi 100 ming so‘mni tashkil etadi.
Bundan tashqari, kurslar raqobatbardosh AKT-loyihalarini bosqichma-bosqich amalga oshirish, jumladan, iqtidorli talaba qizlar uchun startap loyihalarini ishlab chiqish va amalga oshirishda yordam berishni o‘z ichiga oladi.
Trening natijalariga ko‘ra, uchta eng yaxshi startap zamonaviy noutbuklar bilan taqdirlanadi.
Ro‘yxatdan o‘tish uchun arizalar 10-sentabrgacha qabul qilinadi.
Izoh (0)