Навальнийнинг сафдошлари Франция ва Швейцариядан Путиннинг собиқ рафиқасига тегишли кўчмас мулкни хатлашни сўради

Россиялик мухолифатчи Алексей Навальнийнинг Коррупцияга қарши кураш фонди (ККФ, экстремистик ташкилот деб эълон қилиниб, тугатилган)даги сафдошлари Франция ва Швейцария ташқи ишлар вазирликларига мурожаат қилиб, Россия президенти Владимир Путиннинг собиқ рафиқаси Людмила Очеретнаяга қарши санкциялар киритишни сўради, деб ёзади Meduza.

Бундан ташқари, фонд Людмила Очеретнаянинг ҳозирги турмуш ўртоғи Артур Очеретнийга қарши санкциялар жорий қилишни, шунингдек, уларнинг мол-мулкини хатлашни талаб қилди.

Август бошларида Навальний жамоаси Путиннинг собиқ рафиқаси ҳақида фильм эълон қилганди. Суриштирувда Людмила ва Артур Очеретнийларнинг чет элдаги кўчмас мулклари — Биариццадаги вилла ҳамда Давод ва Малагадаги квартиралари ҳақида ҳам айтилган.

«Очеретнийларнинг хориждаги кўчмас мулклари коррупция маблағларига сотиб олинганини исботладик ва Евроиттифоқ ушбу активларнинг барчасини хатлайди, деб умид қиламиз… Ишончимиз комилки, Путиннинг яқин доирасидаги одамларга қарши санкциялар сиёсий ва бизнес-элиталарни уни қўллаб-қувватлашдан воз кечишга мажбурлайди. Бу эса унинг режимини йўқ қилиш ва Украинада у бошлаган урушни тўхтатиш учун энг муҳим қадамдир», — дейилади мухолифатчилар баёнотида.

Россия Украинага бостириб кирганидан кейин Алексей Навальний сафдошлари «коррупциячилар ва урушни аланга олдирувчилар» рўйхатини юрита бошлади. Ҳозир унга 6,5 мингдан ортиқ одам киритилган бўлиб, ККФ фикрича, уларга нисбатан санкциялар киритиш керак.