13-avgust kuni Tojikistonning Nurek shahrida Xatlon viloyati va O‘zbekistonning Surxondaryo viloyati o‘rtasidagi hamkorlikni rivojlantirish forumi doirasida umumiy qiymati 26,6 million dollarlik mahsulot va mahsulotlar yetkazib berish bo‘yicha 6 ta shartnoma imzolandi. Bu haqda Xatlon viloyati hokimligiga tayanib Asia-Plus xabar berdi.
Qayd etilishicha, forumda ikki viloyat tadbirkorlari, shuningdek, Xatlon viloyati rahbarlari Qurbon Hakimzoda va Surxondaryo To‘ra Bobolov ishtirok etgan. Forumda ikki davlatning sarmoyaviy imkoniyatlari va eksport salohiyati haqida fikr yuritilgan.
Forum yakunlari bo‘yicha ikki viloyat o‘rtasida “Yo‘l xaritasi”, turizm sohasida hamkorlik to‘g‘risida memorandum, 15 ta investisiya shartnomasi imzolangan. Jami 23 ta hamkorlik shartnomasi imzolangan.
12-avgust kuni Xatlon viloyatiga tashrif buyurgan O‘zbekiston delegatsiyasi viloyatdagi kichik sanoat korxonalari, zamonaviy issiqxonalar, tarixiy obidalar, qishloq xo‘jaligi yerlarida bo‘lgan.
Joriy yilning birinchi yarmida ikki davlat o‘rtasida 262 million dollardan ortiq savdo aylanmasi amalga oshirilgan. Bu 2021-yilning shu davriga nisbatan 32,4 foizga kam hisoblanadi.
Eksport qariyb 97 million dollarni, import esa 165 million dollardan ziyodni tashkil etgan.
Izoh (0)